Immanuelsen: Pisassanik agguaasarnerit politikerit aalajangigassaraat
Aalisarnermut ataatsimiititaliarsuup aalisarnermut inatsisissamut nutaamut innersuussutigigallakkani sapaatip akunnerani kingullermi sisamanngornermi saqqummiuppai. Periusissat innersuussutillu oqallisissanngortippaat.
AAMMA ATUARUK Aalisarnermut ataatsimiititaliarsuaq: Aqutsilluarneq inuiaqatigiinnut iluanaarutaanerussaaq
Aalisagaqassutsimut aningaasarsiornikkullu attanneqarsinaasumik pisassiisarnissamut ilaasumik ungasinnerusumut isigisunik aqutsinermut pilersaarusiornissaq saqqummiunneqartuni angisuuni ilaavoq.
Pisuni ataasiakkaani politikerit isummertariaqarput .
Ataatsimiititaliarsuaq tamatumunnga atatillugu aalisartut pisassaarullutik kimigiisileraangata poitikerit aalisakkanik immikkut pisasiisinnaajunnaarsillugit qanimut akuujunnaarnissaannik siunnersuuteqarpoq.
Kisianni piniarnermut aalisarnermut nunalerinermullu naalakkersuisoq Jens Immanuelsen siunnersuutigineqartumut qularpoq. Taannami isumaqarpoq tamanna politikerit aalajangigassarigaat.
- Naluara suna pillugu taanna atorneqarnersoq, imaagunarpoq pisassiissutit nungutillugit piumasaqaateqartoqalertarmat, saniatigut pisasseeqqinnissamik aamma taama tamatigut naalakkersuinikkut suliaqarnermi nalilersugassaavoq, Jens Immanuelsen oqarpoq.
AAMMA ATUARUK Naalakkersuisooqatigiit tapersersortaasalu isumaqatigiinnginnerat pissutaavoq
Aalisarnermut ataatsimiititaliarsuup siunnersuutigaa, politikerit pinngortitaleriffimmiit innersuussutinik sippuillutik pisassiinisamut kimigiiserfissaajunnaarlutik agguaanermi nigorsimaalissasut.
Jens Immanuelsenili taama periarfissaqaannarusuppoq:
- Tassa imaappa aalisartunit kimigiiserfigineqarussi aalisagartassanik pisassiisinnaasusi ?
- Apeqqutaavoq ukiup ingerlanerani inuussutissarsiornikkut periarfissat qanoq isikkoqarnersut, Aalisarnermut Piniarnermut nunalerinermullu naalakkersuisoq Jens Immanuelsen taama oqarpoq.
Aalisarnermut ataatsimiititaliaq oqaaseqarusunngilaq Inatsisartuni Aalisarnermut Ataatsimiititaliaq KNR-imit oqaaseqartinniarneqaraluarpoq, innersuussutigineqartulli ataasiakkaat pillugit isummersimanngilaq.
Aalisarnermut Ataatsimiititaliarsuup sulinerani aalisarnermut ataatsimiititaliap peqataatinneqannginnera naammaginnagu, ataatsimiititaliaq marlunngornermi tusagassiuutinut nalunaaruteqarluni erseqqissaavoq.
Ataatsimiititaliap maanna Naalakkersuisunut sakkortuumik inassutigaat aalisarneq pillugu ataatsimiititaliarsuup suliai tamaasa ataatsimiititaliamut matoqqasumik saqqummiuteqqullugit.
