Immami uumasut eqqumiitsut nassaarineqarput

Australiami Queenslandip sineriaata avataani 1400 meterinik itissusilimmi uumasut eqqumiitsut itsarsuarnitsat, Steven Spielbergip filmiliaani Jurassic Parkimi takuneqarsinnaasutut ittut, nassaarineqarput.
Allattoq Elisa Isaksen
juulip 16-at 2010 07:22

Queensland Universitetimi ilisimatuut assiliissutit teknikkikkut ineriartortinneqarluarsimasut atorlugit ilaatigut assilisimasaat tassaapput eqalussuit arfinilinnik masillit, peqquit eqqumiitsut ataatsimoortut, amikut qanganisarpaluttut tattallit aamma aalisagarujussuit ersinarluinnartut. Australiami tusagassiorfiit tamanna allaaseraat.

Aalisakkanik ilisimatooq, Justin Marshall, nutaarsiassaqartitsivimmut AFP-mut oqarpoq, uumasut immamiittut allaanngitsut "uumasut ujaranngorsimasut uumassusillit". Marshallip pingaartumik maluginiarpaa, eqalussuaq nassaarineqartoq "eqqumiilluinnartunik sulussugutilik".

Ilisimatuut tunfiskep niaquanik neqitserlutik, uumasunik eqqumiitsunik ussatsitsillutik, assiliiviit ungasianit aqunneqartut atorlugit, 1400 meterisut itissusilimmi ulluni qulini assiliisimapput.

Ilisimatuut oqarput, uumasut eqqumiitsut tamakku taarluinnartumi uumasuusut, nunamilu naqitsinermit 140-riaammik sakkortunerusumik naqitsinilimmiittuullutik, nukimmillu atuivallaarumanatik arriitsuinnarmik nikittartut, immammi naqqani uumaffigisaminni nerisinnaasaat killeqaqaat.

- Uumasut taakkua ilaat ukiumut ataasiaannarlutik marloriaannarlutilluunniit nerisarput, Marshall nutaarsiassaqartitsivimmut AFP-mut naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq