Immakkut angallannermi isumannaallisaanissaq eqquissaaq

Umiarsuarsuit takornariartaatit marlukkaarlutik, amerlanerullutilluunniit angalaartalernissaat pivisunngussappat, Arctic Umiaq Line-imut kinguneqarsinnaasoq, Ole Ziemer, Inuussutissarsiornermut Aqutsisoqarfimmeersoq, oqarpoq:

- Arctic Umiaq Line ataasiinnarmik sinersortaateqarpoq. Imarsiornermullu Qullersaqarfiup siunniussaa, tassa umiarsuit marlukkaarlutik, amerlanerullutilluunniit angalasalernissaat piviusunngussappat, Arctic Umiaq Line ajornartorsiuteqalissaaq. Umiarsuaatileqatigiiffiimmi allat isumaqatigiissuteqarfigeqqusaanngilaat. Taamaalissappallu Arctic Umiaq Line atorunnaaginnartariaqarsinnaassaaq, Arctic Umiaq Line marlunnik sinersortaatilerluni sullissinissaminut akissaqanngilaq, Ole Ziemer oqarpoq.

Umiarsuarsuit marlukkaanngikkaluarlutik immikkulli attaveqaqatigiinnermikkut ikioqatigiissinnaanissaat anguniagaavoq.

Umiarsualivinnik umiarsuarsuarnik takornariartaatinik marlunnik amerlanerusunilluunniit talinneqarfigineqarsinnaasunik angisuunik Nunatsinni peqanngilaq.

- Tamatumunnga pissutaasut marluupput. Siullermik kissaatiginngilarput umiarsuit marlukkaarlutik umiarsualivinnut talittarnissaat, tassami umiarsualiviit mikinerit umiarsuarsuarsuarnik marlunnik taliffigineqarsinnaanngillat. Aappassaanik, umiarsuaatileqatigiit mikisut, umiarsuarnut allanut sumiinnerminnik aammalu angalanerminnut piffissat suunersut nalunaarutigisinnaanngilaat. Unammilleqatigiinneq taamaappoq.

Immakkut angallannermi isumannaallisaanissaq, Inuussutissarsiornermut Aqutsisoqarfiup pingaartittorujussuuaa, takornartitsinerulli siuariartinneqarnissaa pingaartillugu, Ole Ziemer oqarpoq