Imikoorut mingutsitsisarpoq

Angerlarsimaffinni imeq atorneqartoq nunarput tamakkerlugu mingutsitsisarpoq. Uffarfinni, igaffinni errorsinernilu imeq atorneqartoq aqqusinernut qaqqanullu kuuttarpoq sanilerisanullu ulorianartorsiortitsisinnaalluni.

Nunaqarfinni illoqarfinnilu minnerusuni imikoq ajornartorsiutaaneruvoq. Meeraaqqat nangiinik errorsinermi, neqilerisimatilluniluunniit imeq atorneqartoq uffarfimmit igaffimmiluunniit erruivimmit kuutsinneqartarpoq.

Tassanngaanniit qaqqanut, aqqusinernut, imaluunniit kabelit eqiteriffiinut sikaaviusanik puukkanut appasinnerusumiittunut kuuttarpoq, sanilerisalluunniimmi kiileriinut allaat kuussinnaasarluni.

Taamaattoqartillugu tuniluuttunik napparsimalertoqarsinnaavoq, ukiukkut aqqusinernik quasattunngortitsisarpoq, imaluunniit innaallagissamik qamittoortitsisinnaalluni. KANUKOKA-mi teknikkeqarfimmi avatangiisinullu immikkoortortaqarfimmi siunnersorti Jens Romerdahl taama oqaluttuarpoq:

-Aasaanerani imikoq najugaqarfiit eqqaanni taseqqertitsigaangat meeqqat pinnguarfigilersarpaat taamaalillunilu peqqinnerannut ajornartorsiortitsilersarluni. Illut kiileriinut kuussinnaasarpoq ukiukkullu aqquserngit serminngortissinnaasarlugit.

Tamannalu kommuninut naammagittaalliutigineqartuartarpoq.

Ajornartorsiut qaangerneqassappat imikoorutit kuuffiinik sullulinnik sumiiffinni tamani sanasoqartariaqarpoq, imaluunniit kuuffiliortoqarluni, Jens Romerdahl oqarpoq.

Jens Romerdahl-ip ilanngullugu oqaatigaa ajornartorsiutip qaangernissaanut politikerinut innersuussissummik suliaqartussanik suleqatigiissitamik pilersitsisoqarsimasoq.