Imigassat kimittuut matuneqarnerat isumaqatigiinnikkut aalajangigaavoq

Tasiilami meeqqanut ilaqutariinnullu immikkut suliniuteqartoqalernera aallaavigalugu imigassanik kimittuunik matusisariaqalerneq Borgmester Vittus Mikaelsen paaseqatigalugu aaliangiisoqarsimanera, Vittus Mikaelsen-imit eqqunngitsuusutut oqaatigineqarpoq.

Ilaqutariinnermulli naalakkersuisup Aqqalu Abelsen-ip Tasiilami suliniutissat aallartinneqarnissaat eqqarsaatigalugu matusigallarsinnaanissaq paaseqatigiissutigineqarsimasoq aaliangiusimavaa.

Imigassanik kimittuunik killilersuisoqartillugu anngiortumik illoqarfimmut eqqussuisarneq Qaanaap illoqarfiani ilisimaneqartoq Radioavise-ip aaqqissuisoqarfianiit paasiniaanitsinni paasisaqarfigaarput, Qaanaamilu innuttaasut ilaata aterminik isertuuserusuttup oqaatigaa imigassat kimittuut anngiortumik nioqqutigineqartarneri ilisimaneqartoq allaat puujaasaq ataaseq 1000,00 kr-nik akeqartinneqartarluni, Tasiilallu illoqarfiani anngiortumik kimittuunik imigassaarniartoqartalersinnaanera naalakkersuisup aarleqqutiginngilaa oqarluni, imigassat kimittuut illoqarfimmi atugaanerisa annikillisinneqarnissaa aallaqqunneqarsimasinnaangitsoq ilanngullugulu oqaatigalugu, meeqqat inuusuttullu atugaasa pitsaaliorneqarnissaat matusigallartariaqarnermut qitiutinneqarsimasoq.