Imigassartorsimallutik biilertut meeqqallu qimaannakkat

Imigassartorsimallutik biilertut sisamat arfininngornerup ullaavani politiinit naammattoorneqarput.

Angut 18-inik ukiulik, imigassartorsimasoq, biilimik tillitaminik ingerlatsilluni arfininngornerup ullaavani Nuummi ajutoorpoq.

Angut taanna unnerluunneqassaaq tillissimasutut, imigassartorsimalluni biilersimasutut kiisalu biilernermut allagartaqarani biilersimasutut, aviisi Sermitsiaq nittartakkamini taamatut allaaserisaqarpoq.

– Biili aserorluinnarsimavoq angulli ajoqusinngilaq, taama Sermitsiaq.gl-imut ilisimatitsivoq Nuup politiivini pigaartoq Kenneth Boltov.

Angut taanna aqqusinermi 400-rtalimmi biilertilluni ajutoorpoq, biili atugaa Toyota Corolla, kussarluni tuppoq aqquserngup sinaatigooreerluni.

Meeqqat mikisut angerlarsimaffimminnit qimaannarneqarsimasut, isumaginninnermut suliaqartunit isumagineqarput. Meeqqap aappaata aanakkui sumiissusersineqarput, aanakkuinullu tunniunneqarluni.

Aappaa isumaginninnermut pigaartumit isumagineqarpoq, angajoqqaarsiaagallartartunillu isumagisassanngortinneqarluni.