Imigassartorsimallutik angalasut amerlisimapput
Imigassartorsimallutik imaani angallatinik aquttut, ukioq manna aatsaat taama amerlatigisut, Norgemi politiinit naammattoorneqarsimapput. Ukiumut kingullermut naleqqiullugu, imigassartorsimallutik imaani angallatinik aqussimasut 50 procentimik qaffariarsimasut, aviisi Aftenposten allappoq.
Imaani angallatinik aquttut 200-ngajaat politiit naammattoorsimavaat, Norgemilu politiinit ernummatigineqarpoq, imersimatillutik angallatinik aqussimasunik nalunaarsuutit ukioq manna qaffariangaatsiarnissaat.
Inuup aavata imigassamik akoqarnera, imaani angallatinik aqunnissamut killissarititaa 0,8 procentiuvoq. Norgemilu imaani politiineersoq, Kjell Reimsfjord, oqarpoq, politiini imaani sulisut amerlanerugaluarpata imersimatillutik angallatinik aquttartut amerlanerit tigusarineqarsinnaagaluartut.
Angutip inuusuttup imigassartorsimavallaarluni angallammik aquttup tigusarineqartup ataatsip, aavata imigassamik akoqarnera 2 procentimiissimavoq. Imigassartorsimanerup kingunerisaanik imaani angallattut akornanni ajutoornerpassuit Norgemi maannakkut oqallitsitsingaatsiarput.
