Imigassartorsimalluni biilertoq nakkarpoq
Angut biilertilluni sapaatip ullaassaani aqquserngup sinaanut nakkarpoq. Taama pisoqarneranik politiit nalunaaqutaq sisamanngulersoq kalerrinneqarput.
- Tassani paasineqarpoq angut imigassartorsimasoq Sanatorievejimilu aqquserngup sinaanut nakkarsimasoq. Aaverneqarpoq taannalu misissoqqissaarneqareerpat paasinarsiumaartoq qanoq sakkortutigisumik eqqartuunneqassanersoq, Qaqortumi vicepolitikommisæri Bent Ole Kleist KNR.gl-mut oqarpoq.
Sineriammi illoqarfiit allat assigalugit sapaatip akunnerata naanerani Qaqortumi ernguttoqangaatsiarsimavoq. Politiit arlaleriaqalutik angerlarsimaffinni eqqissiviilliortunut orniguttarsimapput aqqusinermilu aalakoorpallaat aamma isumagisariaqarsimallugit.