Imigassaq kimittooq Qaanaami akueraat
![](/sites/default/files/styles/image_934x467/public/article_images/vin_630_5.jpg?itok=JoakmhFx)
Qaanaami pigisaanilu imigassamik kimittuumik tuniniaanerup ammaqqinnissaa akueralugu 147-t taasipput 94-illu akerliullutik.
Tassalu Qaanaami nunaqarfiinilu siunnerfiliisumik taasisitsinerup ippassaq ingerlanneqartup inernera.
Taasisitsinerup inerneri Qaanaami ammaaqqittoqarnissaanut amerlanerussuteqartut kissaateqarnerannik ersarissumik takutitsipput. Kisitsisilli nunaqarfinni Savissivimmi, Siorapalummi Qeqertamilu allaanerupput. Imigassamik kimittuumik tuniniaanerup ammaqqinnissaanut akerliusut taakkunani amerlanerussuteqalaarlutik. Nunaqarfinni 22-t ammaaqqinnissamut akerliupput, 18-illu akuersaarlutik, Masaana Petersen Qaasuitsup Kommuniata Qaanaami innuttaasunik sullissivianeersoq KNR-imut oqarpoq.
Siunnerfiliisumilli taasisitsineq matumani pineqarpoq, taaseqataasullu taasinerminni tunngavilersuillutik akissuteqarnissaminnut periarfissinneqarput. Akissutaat maanna katersorneqarput Qaasuitsup Kommunianullu ingerlateqqinneqassallutik, tassanilu isumaginninnermut ataatsimiititaliap suliaq kommunalbestyrelsimut marsip qaammataani saqqummiussassanngorlugu suliarissavaa.