Imigassap matuneqarnissaa naluaat
- Ilaqutariinnut naalakkersuisup meeqqanut ilaqutariinnullu immikkut suliniartoqarneranut atatillugu borgmester Vittus Mikaelsenimik ataatsimeeqateqarneranik, imigassalluunniit kimittuut tunisaanerisa kommunitsinni unitsinneqarnerat pillugu arlaannaataluunniit ilisimatinngilaatigut.
- Tamanna radioaviisimi ippassaq tusarliunneqarmat assorsuaq tupappunga. Tusakkakka ilumoornersut Tasiilarlu pineqarnersoq uppernarsiniarlugu internetikkut nutaarsiassat takupallappakka. Tusakkakkalu ilumoorsimapput.
- Naalakkersuisut pilersaarutaat ataatsimeeqateqarneralluunniit pillugit borgmester Vittus Mikaelsenip ilisimatinngilaatigut, aamma imigassat kimittuut tunisaajunnaarnerat pillugu.
Kommunalbestyrelsimi ajornartorsiutit iliuuseqarfiginiarlugit suliniuteqalernikuuvugut, ilaatigut pisiniarfeeqqami imigassanik tuniniaaneq unitsillugu, pisiniarfissuarmi taamaallaat tuniniarneqalerlutik. Tamatuma kinguneranik illoqarfimmi aalakkuttut takussaajunnaarnerat malugisinnaavarput, borgmesterimut siullertut tullersorti Andersine Kristiansen radioaviismut oqarpoq.
- Isumaqarpunga eqqortuliornerunanilu ajuusaarnartuusoq borgmester Vittus Mikaelsenip imaluunniit naalakkersuisunit kommunimi qinikkat ilisimatinneqanngimmata aamma isumaqarpunga kommunalbestyrelsimi iliuuseqarluta suliniarnivut ataqqineqanngippallaartut, borgmesterimut siullertut sinniisussaq Andersine Kristiansen oqarpoq.