Savissivik Imigassanik nioqquteqaqqusaannginneq immiortoqalersitsisoq
Qaasuitsup Kommuniani nunaqarfimmi Savissivimmi innuttaasut amerlanerussuteqartut kissaataat naapertorlugu nunaqarfimmi imigassanik aalakoornartutalinnik nioqquteqarsinnaaneq ukioq kingulleq novembarimi unitsinneqarpoq.
AAMMA ATUARUK Savissivimmi imigassamik nioqquteqarneq unitsinneqartoq
Taamaattoqarnera iluaqutitaqarlunilu ajoqutitaqartoq nunaqarfimmi aqutsisuni ilaasortap Hans Karlsenip oqaluttuaraa.
- Ullut tamaviisa aalakoortunik takussaarpugut. Taanna iluaallappoq, pingaartumik meeqqanut, Hans Karlsen KNR-imut oqaluttuarpoq.
Immiaaqqat imigassallu kimittuut nioqqutigineqaqqusaajunnaanerisa kinguneranik innuttaasut ilaat aalakoorniarnertik unitsinngilaat. Angerlarsimaffinnimi immiortalersimapput.
- Angerlarsimaffinni immiortarnerit assut saqqumilerput, Karlsen oqaluttuarpoq.
- Taamaattoqarnera iffiornermi akussanik amigaateqarnartorujussuanngorpoq, qapuimmi immiornermut akorineqartaramik nunguttuaannalerput, Hans Karlsen oqarpoq.
Hans Karlsenip amerlanerussuteqartut kissaataat ataqqivaa, oqaatigalugulu nunaqarfimmi aalakoornartutalinnik pisisoqarsinnaannginneri ajornartorsiutaanngitsoq. Taassumali nassuerutigaa nunaqarfinni aqutsisut pinaveersaartitsinerup saniatigut qanoq iliuuseqarsinnaanngitsut.
- Unioqqutitsinerit politiinit kommunefogdiniillu isumagineqartussaapput, Hans Karlsen Savissivimmi nunaqarfimmi aqutsisuni ilaasortaq oqarpoq.
Sebastian Bech Qaasuitsup politiivineersoq Savissivimmi immiortoqartarneranik nalunaarutiginnittoqarsimanngimmat politiit iliuuseqarsinnaannginnerarpai. Innuttaasut immiortoqartarneranik ilisimannittut politiinut nalunaaqqullugit, Sebastian Bech kaammattuivoq.
