Imermut uuttuutit uatsi
Ineqartut imermik sipaartut taamaalillutik imermik sippulimmik atuisunut akileeqataasariaqarallarput. Qasigiannguarmiu Villads Olsvig INI A/S-imit s salloqittarneqartutut misigaaq.
- 2005-imi allagarsivugut, 2006-imi januaarip aallaqqaataani akiliuteqartalissasugut, tamannalu pissusissamisoortutut isigaarput. Kisianni aasit taamungaannaq, agguaqatigiisitsinikkut aki nassaarineqartassasoq. Allakkiamut ilangullugu neriorsorneqarpugut, najugaqarfigisavut ataatsimoorussat 2007-ip ingerlanerani imermut uuttuusersorneqassasut. Kisianni ullumikkut suli qisuariartoqanngilaq, Villads Olsvig oqarpoq.
- Ukiup affangajaa inigisaminniinneq ajorpugut, asimi illuaqqatsinniitaratta. Taamaakkaluartoq imermut akiliutigisartakkavut nikinneq ajorput, utertoorneq ajorpugut aamma akileeqqineq ajorpugut, Villads Olsvig naggasiivoq.
INI A/S-imi teknikkimut pisortaq, Jesper Johansen, oqarpoq ukioq manna imermut uuttuusersuinissamik neriorsuimanatik.
Atuisut imermik sipaartut inatsisartunit eqqarsaatigineqarnikuupput, Namminersornerullutik Oqartussat Kommunillu peqqugamikkit, imermut uuttuutinik 2010-iutinnagu ikkussueriissasut. Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq akuerigamikku taamaaliorput.
Tassa inatsit malillugu imermut uuttuusersuisoqartussaavoq, kisianni aatsaat ukiut pingasut qangiuppata, aatsaallu pissutsit asigiingitsut iluatsissimappata.
Peqqussummi paragraf 29, tassunga tunngasuuvoq, immikkoortuinillu oqaatigineqarpoq, imermut uuttuutinik inissianut ikkussuinissamut pisussaaffik atuutissanngitsut, ikkussuinissaq teknikip tungaanit isigalugu isumatusaarnerunngippat, illuutip teknikikkut atortuinik iluarsaassinissaq 1. januaari 2011 nallertinnagu pisussatut pilersaarusiorneqarsimappat, imaluunniit ikkussuinissaq najugaqatigiiffiup aningaasaqarneranut naleqqutinngitsumik nammakkiissappat.
