Imermik pilersorneqarnerput qanoq ippa?

Demokraatit sinnerlugit inatsisartunut ilaasortaq Lene Knüppel inatsisartut suleriaasianni § 36 naapertorlugu naalakkersuisunut apeqquteqarpoq,

Apeqquteqaataalu nunatsinni imermik pilersuinermut tunngassuteqarpoq.

-Malugisimavara suli illoqartoq imilerneqarsinnaanngitsunik, imeq tankimut dunkimulluunniit immiullugu aanneqartarpoq imaluunniit nammineerluni imertartoqartarluni. Ilimagivara Naalakkersuisut uattulli takujuminartutut isumaqarfigissanngikkaat, kalaallit ilaasa peqqinnissamut taama pingaaruteqartigisumik imermik kuuginnartumik suli pilerneqarsimannginnerat, Lene Knüppel allappoq.

Tamanna pillugu Lene Knüppelip paaserusuppaa ukioq kaajallallugu imermik kuuinnartumik peqanngitsut tankillilluunnit qassiunerat nalunaarsorneqarsimanersoq.

Lene Knüppel isumaqarpoq kuuinnartumik imeqannginneq peqqinnissamut sunniuteqarsinnaasoq.

-Inuttut ineqarnikkullu eqqiluisaarneq pitsaanerusoq nappaatit siaruarnissaanut annikillisaataasarpoq, tassanilu assersuutigissavarput sakialluummik nappaateqalersarneq.

Lene Knüppelip imermik pilersuinermi politikkikkut anguniakkat pingaarnerit pillugit Naalakkersuisut paasissutissiinissaat ujartorpaa.