Imeq pillugu mianersoqqusinerit Naalakkersuisut tusaanngitsuusaarpaat
Qamussuit illiniuliuutit nipituuliortuupput assakaasoqarlutik nutsuisulinnik, qimussillu aqqutissaannut manissaatitut atorneqartarlutik. Qamussuit illiniliuutit orsussamik uuliamillu annertuumik atuisarput, aserussagaluarpatalu tamanna pinngortitamut mingutsitsinermik kingunipiloqarsinnaalluni:
- Imeqarfiup tungaanut aqqutigeqqunagu killiliussani angallannermut sakkortuumik killilersuisoqartuaannarnikuuvoq. Qamutit, sakkut uumasullu imeqarfiup eqqaani atorneqarnissaat inerteqqutaavoq. Aatsaallu iluarsaassisoqassatillugu immikkut ittumik akuersisoqartarpoq, Nunatsinni nakorsaaneq Flemming Kleist Stenz oqarpoq.
Qamutit taamaattut, imeqarfiit eqqaannut qanilleqqusaanngillat. Ilulissanilu imeqarfiup tungaanut aqqutigeqqunagu killiliussap eqqaani qamussuarnik illiniliuutinik Naalakkersuisut Qaasuitsup Kommunianut annerpaamik qaammammut marloriarlutik akuersissummik tunisisarput. KNR-ip pissarsiaanni takussutissat arlallit tamanna paasinarsisippaat, nunatsinni immikkut ittumik imeqarfeqarnerup tungaatigut ilisimannittut - matumani nunatsinni nakorsaaneqarfik ilaalluni - immikkut akuersinissamut mianersoqqusigaluartut akuersisoqarpoq:
- Imeqarfeqarnermut tunngassuteqanngitsumik motoorilimmik ingerlasoqarsinnaaneranik maannakkut akuersisoqarsimavoq, tamannalu imeqarfiup eqqaani ajutoortoqarnissaanik aarlerinartoqartippara. Ajutoortoqassagaluarpallu sivisuumik inuiaqatigiinnut angisuumik ajoqutaalersinnaavoq, Flemming Kleist Stenz oqarpoq.
Nukissiorfiit aamma Namminersorlutik Oqartussat inatsisilerinermut allaffiata immikkut akuersinissaq mianersoqqussutigigaluarpaat. Akerliusoqaraluartorlu Namminersorlutik Oqartussanit Qaasuitsup Kommunia immikkut akuerisaavoq, qimussit aqqutaat aalisartunut piniartunut takornarianullu ulorianartarmat, Nunamut namminermut Naalakkersuisup Anthon Frederiksenip taama tunngavilersorpaa:
- Takornarissani qimussiussisarnermi, qimussit aqqutaanni ingerlaarfiusartoq ilisimatinneqarnerput naapertorlugu, takornarissat tassani navialisartut taamaattumik inunnut ulorianartorsiunnginnissaq aaqqiisoqarsinnaanera tamanna naalakkersuisuni isiginiarsimavarput, Anthon Frederiksen oqarpoq.
Nunatsinni nakorsaaneq, Nukissiorfiit Namminersortullu Oqartussat ataanni inatsisilerinermut allaffiup immikkut akuersissuteqarnissaq itigartinneqarnissaanik siunnersuipput, sooq taakku tusaaniarneqanngillat?
- Tassa pissutsit immikkut illuinnartut tassani pissutigineqarput. Aammalu akuersisoqassappat piumasaqaatit sukangasuut tunngavigalugit akuersineq ingerlanneqarluni, Anthon Frederiksen oqarpoq.
Qanoq ilillutit imermik mingutsitsisinnaasumik akuersisinnaavit?
- Mingutsitsisinnaasumik oqarneq, immaqa aamma sumiiffinni assigiinngittuni pissutsit isiginiarneqartariaqassapput. Qamussuaq taanna ajutuussagaluarpat uuliakoorsinnannera taanna, piumasaqaatitsinni allapparput pinngitsoorani uuliakoortoqalissagaluarpat ingerlaannarluni qamussuarmik atuineq unitsinneqassasoq. Aammalu uuliakoorneq ingerlaannaq peerneqassasoq, Anthon Frederiksen oqarpoq.
Nakorsaanerup annilaangassutigaa immikkut akuersisarneq nunatsinni atorneqalissasoq, Anthon Frederiksenillu, Ilulissani Borgmesteriunermini pineqartumut akuusimasup taamaattoqannginnerarpaa, Ilulissat kisimi immikkut akuerineqartoq oqaatigalugu:
Borgmesteriuninni immikkut akuersissummik qinnuteqartarsimavusi pingasoriarlusilu itigartinneqartarlusi. Maannakkullu Naalakkersuisunngorlutit qinnuteqaat akuerisimavaat, immaqa tusarnaartut ilaasa eqqumiigissavaat. Tassunga qanoq oqaaseqarusuppit?
- Immaqa qujanaqutigivaa, pissutsit qanoq ittuuneri paasisimalluinnaqqissaarakkit, taamaalilluni pissusiviusut tunngavigalugit aalajangerneq pivoq, Anthon Frederiksen naggasiivoq.
Anthon Frederiksenip oqaatigaa avatangiisinut inatsit nutaaq Inatsisartut ukiamut ataatsimiilerpata suliarineqassasoq. Siunissani nunatsinni imeqarfeqarnermut tunngasunik pilersaarummik inatsit imaqassaaq.
