Imeq nunatsinneersoq pilerigineqaqaaq

- Nunatta ernga pilerigineqaqaaq, taama oqarpoq Qeqertarsuup ernganik tunisassiornissamut, kinguartinneqarsimasumulli, ingerlatsivik, Greenland Springwater.

Japanimiut nioqqutissiassanik eqqussuisartut naatsorsuutigisimavaat, Qeqertarsuup ernga tunisaalerpat Manerassuup sineriaanut ullormut puiaasanik 100.000-nik tunisaqarsinnaasassallutik. Tunisassiornerlu ingerlalluariarpat ukiut pingasut tallimalluunniit ingerlaneranni puiaasat ullormut millionit affaanik amerlassusillit tunineqarsinnaanissaat naatsorsuutigineqarsimavoq.

Greenland Springwaterimi pisortaq, Guido Frank, tusagassiutinut taama allagaqarpoq.

Namminersornerullutik Oqartussaniit piumasarineqartumik maanna nakkutigineqarpoq, Qeqertarsuup ernga Qeqertarsuup illoqarfianut, illoqarfiullu tunisassiorfianut, aamma pilersuisinnaassanersoq.

Greenland Springwaterip siulersuisuiniit aamma qinnutigineqarsimavoq suliniutip tamatuma siunissami siammasinnerulersinneqarumaarnissaa, tassa imermik annertunerusumik suli tunisassioqqittoqarsinnaanera qulakkeerniarneqarsimalluni. Suliniullu tamanna suliffeqarfiit Rambøll A/S aamma Greenland Ressources A/S suleqatigalugit ingerlanniarneqarpoq.

Massakkorpiarli imermik tunisassiortoqanngilaq.

Puiaasat Qeqertarsuup ernganik imallit siulliit tunisassiarineqarlutik aallartissapput 2008-p naalernerani. Tamannalu nallertinnagu tunisassiorfimmik, talittarfimmik, quersuarmillu sanaartortoqaqqaassaaq.