Imeq minguitsoq inuttut pisinnaatitaaffinngoqquaat
Nunatsinni sumiiffinni tamangajanni imermik minguitsumik nillaarissumillu imissaqarnerput nuannaarutigisinnaavarput. Taamatut imermik amigaateqannginnerput, nunarsuarmioqatitta amerlaqisut usorisinnaavaat.
Maannali Naalagaaffiit Peqatigiit aalajangersaapput, imermik minguitsumik pissarsisinnaanissaq inuit pisinnaatitaaffiattut isigineqassasoq.
Tamatumunnga pissutaavoq, inuit millionilippassuit, meeraanerusut, nappaatinit imermit mingulimmit aallaaveqartumit toqquteqartarmata.
Naalagaaffiit Peqatigiinni amerlanerussuteqarluartut, inuit pisinnaatitaaffiinut nalinginnaasunut erngup minguitsup piumasaqaatinut ilanngunneqarnissaa ippassaq aalajangiuppaat.
Siunnersuut Boliviamit saqqummiunneqarpoq, Naalagaaffiit Peqatigiinnilu nunanit ilaasortaasunit 192-iusunit amerlanerussuteqarluartut akuersillutik taasipput, amerlanerusut suliffissuaqarfiusut, akerliusoqaranilu. Naalagaaffiit 41-t taaseqataanngillat. Tysklandimi nutaarsiassaqartitsivik dpa taama nalunaaruteqarpoq.
Taamaattorli taamatut aalajangersaanerup kinguneranik nunarsuatsinni inuit tamarmik minguitsumik maanna imissaqalernerannik kinguneqarnavianngilaq.
Kisianni tamatuma inuit pisinnaatitaaffiinut aalajangersakkami ilanngunneqarnera naalakkersuinikkut pingaarutilerujussuusoq, nutaarsiassaqartitsivimmi Ritzauimi allaaserineqarpoq.
