Imeq Danmarkimi akisunerpaavoq

Akigititat taama qaffasitsiginerat qallunaat atuisartut ajorinngilaat, tamanna pinngortitamut iluaqutaasoq isumaqarfigigamikku, illuatungaanilu inuussutissarsiortut aamma nunalerisut akigititanik naammagisimaannginnerupput.

Misissuinerup nunani killerni 20-ni ingerlanneqartup takussuserpaa, Danmark imermik akigititaqartut nunat akornanni sallersarigaat, imeq kubikmeterimut agguaqatigiisillugu 37,23 koruuneqarluni. Skotlandimut tulliulluni inissisimasumut sanilliullugu 7 koruunimik akit qaffasinnerupput, imermiillu akikinnerpaamit Mexicomiittumit kubikmeterimut akiusumit 34,45 koruunimik qaffasinnerulluni.

Sanillersuussissagutta, kalaallit atuisartut imermut kubikmeterimut aki qaffasinnerpaaq akilertagaat 35,79 koruuniuvoq.

Carl-Emil Larsen Danvameersoq, nunani tamalaani imermik aamma imermik eqqakkamik pilersuisartut soqutigisaqaqatigiiffianneersoq malillugu, imermut pilersuinermut atatillugu aningaasartuutit tamarmiusut atuisartunit Danmarkimi akilerneqartarnerat akiusut qaffasinnerannut patsisaavoq.

- Nunani allani, soorlu Italiami taama iliortoqarneq ajorpoq, The Copenhagen Postimut oqarpoq.

Qallunaat imermik sipaarnerulersimasut oqaatigaa.

- Imermik atuineq ukiuni kingullerni 20-ni annikilleriarujussuarsimavoq, erngup akiata qaffasissup imermik sipaarnerulersissimavaatigut, Carl-Emil Larsen oqarpoq.

Inuussutissaqarnermik suliffissuaqarnermut atatillugu erngup akiata qaffasinnerpaaffissani tikissimavaa.

Qallunaat nunalerinermut inuussutissaqarnermullu siunnersuisoqatigiit ilisimatitsissutigaat, suliffeqarfiit imermik sipaarniaqqissinnaanngitsut.

Siunnersuisoqatigiit oqaatigaat, nunani allani niuerfinni unammillersinnaaneq imermut akiusut assigiinnginnerujussuinit ajorseriartinneqartoq.