Imeq bakteriaqartoq: Eqalugaarsummiut imeq qalaateqqaassavaat
Nunaqarfimmi Eqalugaarsunni imeq bakteriaqartoq paasineqarpoq. Taamaammat imeq imertinnagu qalaateqqaarneqassaaq.
Allattoq Simon Uldum -
Nunaqarfimmi imeqarfik bakteeriaqarpallaartoq misissuinermi kingullermi uppernarsineqarpoq.
Taamaammat nunaqarfimmiunut inassutigineqarpoq erngup imerneqannginnerani allatigullu atunnginnerani qalaateqqaarneqassasoq.
Aammattaaq suliffeqarfiit inuussutissanik nioqqutissiortut suliffeqarfiillu allat peqquneqarput imeq qalaateqqaassagaat, tamannalu aamma tunisassiornermut/atuinermut atuuppoq.
Qalatsitsinissamik innersuut/peqqussut unitsinneqarumaarpoq, erngup ajoquteqarunnaarnera misissuinerit nutaat takutippassuk. Uumasunut Nakorsaqarfik Inuussutissalerinermullu Oqartussaaffik taama nalunaaruteqarpoq.