Nuummi inuit mittarfeqarfimmiittut kuuffimmiit imermik ingerlaannaq imersinnaajunnaarallarput.
Nuummi mittarfeqarfimmi allaffeqarfeqartut nalunaarfigineqarput, mittarfeqarfimmut imermik pilersuisoq qaffasippallaartumik bakterianik coliforme-nik akoqalersimammat imeq imertinnagu qalatseqqaarneqartassasoq.
Nukissiorfiup imeqarfik mittarfeqarfimmut pilersuisoq ingerlaannartumik klorimik akua qaffappaa, illorsuarmilu allaffeqarfeqartut tamarmik ippassaq nalunaarfigiortorneqarlutik. Ataasinngorpalli misiliummik nutaamik imeq misiliisoqassaaq.
- Marlunngorpat aatsaat iluamik paasisaqassaagut, bakteeriaajaallu iluatsissimanngippat tupinnassaqaaq, Nukissiorfimmi ingerlatsinermi pisortaq Ove Nielsen oqarpoq.
Taanna erseqqissaavoq Nuup immikkoortortaasa ilaani, tassalu Nuummi, Nuussuarmi Qinngutsinnilu bakterissanik coliforme-nik nassaarsimanatik. Sillimaniarnerlu pillugu imeq qallussuarminngaanneersoq nalinginnaasumit annerusumik klor-imik akuneqarpoq.