Siullermik qallunaat aviisiisa tamangajammik oqaluttuaq taaqqaarpaat, aammattaarli Norgemi, Savalimmiuni, Islandimi Sverigemilu aviisit soqutiginninnertik malunnartillugu.
Aammattaarli nunani allani, Kalaallit Nunaat pillugu allaaserisaqarpiarneq ajortuni, oqaluttuaq aviisit immikkoortuinut anngussimavoq. Tyrkiami tusagassiuutit imeq akisooq pillugu allapput, taamatullu aamma Ruslandimi aviisit, aap, allaammi aamma nutaarsiassaq Slovakiamut anngussimalluni.
Amerikamiut tusagassiorfiini nunarsuup kissakkiartornera ajoqutissaannaanngitsoq sammineqarpoq. The Digital Journal taamaalilluni allappoq sermit aakkiartortut aningaasarsiutaasinnaasut.