Imavissuit aserornavianngillat

Imarpissuit pillugit nalunaarusiaq eqqoqqissaanngilaq.

ICES, aalisarneq pillugu siunnersuisartuusoq, isumaqarpoq, canadamiut imaq pillugu ilisimatusartut, imarpissuit uumassuseerunnissaannik ersisaarutaat piviusorsiortuunngitsoq.

Imarpissuarni uumassuseqarneq ukiut qulikkaartut arlalialunnguit qaangiuppata aserorneqarnavianngilaq, taamaalisoqarnissaa ullaaq radioaviisimi oqaluttuarigaluarparput.

Imavinni misissuinerit pillugit nunat tamalaat Siunnersuisoqatigiiffianni (ICES-imi) taama isumaqartoqarpoq. EU-p imartaata avannarpasinnerusuani aalisarneq pillugu taakku siunnersuisartuupput.

Canadamiut imaq pillugu ilisimatusartut oqaatigaat, imarpiit ukioq 2048 nallersinnagu aalisarnermit mingutsitsinermillu aserorneqarsimassasut.

ICES-imi aalisarneq pillugu siunnersuisut pisortaat, Hans Lassen, oqarpoq, Canadami ilisimatusartut siulittuutaasa nutaarsiassartaqarnerat takujuminaatsikkini.

- Siulittuutit qangali ilisimaneqarput, ilisimasalinnillu oqallisigineqartorujussuullutik. Tamatumunnga attuumassuteqanngikkaluartumik ersisaarutit piviusunngortinneqannginnissaat anguniarlugu, nunarsuaq tamakkerlugu naalakkersuinikkut aalajangiisoqartareerpoq, Hans Lassen oqarpoq.

Taassuma ilaatigut innersuussutigaa, Naalagaaffiit Peqatigiinni avatangiisit pillugit Johannesburg-imi 2002-mi ataatsimeersuarnermi aalajangiunneqarmat, nunarsuaq tamakkerlugu aalisarneq 2015-imi piujuartitsinissaq tunngavigalugu ingerlanneqalissasoq.

Tamanna iluatsissinnaanersoq maanna ilisimaneqanngilaq.