Avatangiisit

Imartatsinni ukioq manna avaleraasartooqarnerusoq

Atlantikup avannaata avaleraasartuuisa ilarpassui aasiit ukioq manna kimmut nunatta tungaanut ingerlaarsimapput. Pinngortitaleriffik tusagassiorfinnut nalunaaruteqarluni taama allappoq.

Allattoq Kenneth Elkjær

septembarip 01-at 2016 11:41

Nutserisoq Simon Uldum -

Avaleraasartuut amerlanerpaartaat Tuluit Nunaata qeqertartaasa kitaanni ukiisarlutillu suffisarput aasallu qaammataani immanut avannarpasinnerusunut, Nunat avannarliit imartaannut aamma nunatsinnut, tappiorannartunik neriniarlutik ingerlasarlutik.

Upernaaq manna siornamut sanilliullugu sila kiannerusumavoq, tamannalu pissutaalluni avaleraasartuut 2015-imit siusinnerusukkut kimmut ingerlaalersimassagunavillutik.

Ukioq manna imaq Tunup imartaani tappiorannartukinneraaq, taamaakkaluartorli avaleraasartuut amerlanerusut nunatta imartaanut anngussimapput. Tamanna, Pinngortitaleriffik naapertorlugu, 2015-imi aamma Islandip kujataani tappiorannartorpassuaqarsimavoq, taamaassimaneralu aamma kipparternerinut kigaalaqutaasimasinnaavoq.

Aamma atuaruk Avaleraasartoorniarneq siornamit ingerlalluarnerungaatsiartoq

Avaleraasartooqassutsimik nalilersuinerit tamarmiusut, Atlantikup avannaanut tamarmut tunngasuusut, ataatsimut naliliiffigineqarnissaanut ilanngunneqartussaapput.

ICES oktobarip aallartinnerani aatsaat 2017-imi pisassiissutigineqarsinnaasut annertussusissaannik aalajangersimasunik siunnersuuteqarumaarpoq.