Imarsiortut immikkoortortaqarfittaarput

Inuussutissarsiutigalugu assigiinngitsunik imaatigut angallassisartut inuussutissarsiutitut aalajangersuisinnaaneq ilaatigut siunertaralugu, Sulisitsisut peqatigiiffiata aaqqissugaanik immikkoortortaqarfiliorput.

- Soqutigisaqaqatigiinneq aallaavigalugu oqalliffiusinnaasoq amigaatigineqaraluttuinnarsimavoq, soorlu inatsisiliornerup inatsisillu pioreersut malinneqarnissaat eqqarsaatigalugit. Inatsisinik unioqqutitsilluni angallassisarneq minnerunngitsumik eqqumaffiginiarneqarpoq. Sulianut atatillugu ajornartorsiutigineqartut immikkoortortaqarfimmi oqallisigineqartassapput, isummersoqatigiinneqartarluni kiisalu misilittakkanik eqqartueqatigiittoqartassalluni, Kalaallit Nunaanni Sulisitsisut allattoqarfianni pisortaq, Karsten Klausen, oqarpoq.

Immikkoortortamut nutaamut ataatsimiititaliap allattoqarfiullu suliffeqarfiit imaani angallassinermik suliallit tamaasa Sulisitsisut ataannut inissikkusuppaat, assigiiaarnerusunik malittarisassaqarnissaq siunertaralugu. Ataatsimiititaliaq pisortatigut tusarniaanerni peqataasassaaq, suliaminullu atassuteqartut ineriartortinnissaannik ataqqineqarnissaannillu anguniagaqassalluni.

Taakkua saniatigut ataatsimiititaliaq sulianut atatillugu avammut oqaaseqartartuussaaq pisortanut saaffiginninnerni nukittunerunissaq siunertaralugu.

Sulianut taaneqartunut atatillugu peqatigiiffik 15-inik ilaasortaqarpoq, Sulisitsisut ataanni inissisimalluni.

Ataatsimiititaliaq pingasunik ilaasortaqarpoq, tassaasunik; Bo Lings, Søren Lyberth aamma Mike Høegh. Mike Høegh ataatsimiititaliami siulittaasuugallassaaq.