IMAK: Meeqqat atuarfiat annertunerusumik atorfissaqartitsivoq

Ilinniartitaanermut annertuumik aningaasaliisoqarnera iluarinartorujussuuvoq, meeqqalli atuarfiat annertunerujussuarmik atorfissaqartitsivoq, aappaagu aningaasanut inatsisissatut siunnersuummi, ilinniartitaanermut qaffassaanissamut aningaasaliissutiginiarneqartut pillugit, ilinniartitsisut kattuffiata, IMAK-ip, siulittaasua, Sivso Dorph, taama naliliivoq.

-Taama aningaasaliiniarneq iluarinartorujussuuvoq, inuiaqatigiit kiffaanngissuseqarlutik ingerlalernissaannut aqqutissiuisuugami. Kisianni isumaqarpunga atuarfiup ingerlanneqarnera suli annerujussuarmik aallunneqartariaqaraluartoq, inuiaqatigiit ineriartornissaannut tunngavilisuummat.

Sivso Dorphip assersuutigaa kommunit ilaasa nunaqarfinni atuartitsinissartik suli sipaarfigisaraat, naak taama iliorsinnaaneq qangali taamaatinneqareersimagaluartoq. Soorlu akunnernik ilinniartitsiviusussanik ikilisaasarput, Sivso Dorphilu isumaqarpoq tamanna peqqussummik unioqqutitsinerusoq.

- Tamatuma saniatigut nunaqarfinni atuarfiit ima suli amigartigipput, soorlu Saqqami illuinnaat marluk atuarfiup saniatigut aamma atuartitsivigineqartariaqarlutik.

Aappaagu atuarfiliortitsinissamut aningaasat 80 millioni koruunit immikkoortinneqarsimapput, taakkulu naammanngilluinnartut Sivso Dorph naliliivoq.

- Annertunerujussuusinnaagaluarput, oqaatigiuminaapporlu qanorpiaq annertutigisinnaanersut, kisianni soorlu illutamikkut suli aaqqitassartaqartoqarpoq, aammalu apeqquserneqartariaqarpoq kommuninut tapiissutaasartut ilumut naammannersut, tassami soorlu Upernaviup kommuneani nunaqarfiit ilaat neqeroorfigineqarsinnaajunnaarsimapput ilinniartut inaanni inissaqartitsinnginneq pissutigalugu, naak kommunit tamakku pisussaaffigigaluaraat.

Sivso Dorphip erseqqissaatigaa kommuninut tapiissutaasartut naammannersut apeqquserneqartariaqartoq.

- Atuarfiit naammaginartumik ingerlanneqassappata kommuninut aningaasaliissutit annerusut pisariaqartinneqarnerat takuneqarsinnaammat.