Imak: Meeqqat akiliiseqinagit
Ilinniartitsisut meeqqat atuarfianniittut kattuffiata Imakip Kommuneqarfik Sermersuup Nuummi atuarfiit pisoqaanersaanik, Qorsussuarmik matusiniarnera uparuarpaa, soorluttaaq kommunip ilinniartitsisunik 55-inik sipaaruteqarniarnera naammagittaalliutigigaa.
- Kommuneqarfiup Sermersuup aningaasameerneranut meeqqat akiliiseqinagit - meeqqat siunissamik nuannersumik takorluugaqarnerat atatinniarsiuk, Imakip siulittaasua Sivso Dorph taama toqqaannartigisumik allappoq.
Ilinniartitsisut atorfiinik 55-inik sipaartoqarsinnaanera aamma matusinissamik isummerneq, atuarfimmut attuumassuteqartunut Kommuneqarfik Sermersuumit tusarniaassutigineqaqqammerpoq.
- Ilinniartitsisut taakku 55-it, kommunemi meeqqat qularnaannerusumik siunissaqarnissaat, minnerunngitsumillu nunatta siunissami ilinniarluarsimasunik innuttaqalernissaa qularnaarmassuk, Kommuneqarfiup Sermersuup takunngitsoorpaa. Ilinniartitsisut taakku 55-it tassaapput kommunemi meeqqat siunissaannut aningaasaliissutit, Sivso Dorph allappoq.
Taanna aamma isumaqarpoq, atuartut klassemi ataatsimi amerlineqarnerisa kingunerisaanik ilinniarniarneq ajornarnerulissasoq aamma atuaqatigiinni eqqissiviilliornerit annerulissasut.
Kommunalbestyrelse novembarimi ataatsimiilerpat, atuarfiup Qorsussuup matunissa aalajangiifigineqassaaq, matuneqassappallu tamanna aappaagu atuarneq aallarteqqitsinnagu pissaaq.
