Kangaatsiap atuarfia: IMAK-ip suliat qisuariarfigigai inernilersuereerlunilu oqaluttoqannginnissaa kajumissaarutigaa

Atuarfeqarfinni sulisut tusindilikkaat IMAK-ip nersorpai. Kangaatsiamilu suliat inatsisitigut qularnaatsumik suliarineqarnissaat neriuutigalugu.

Allattoq Markus Valentin

maajip 26-at 2026 07:30

Nutserisoq Paarnannguaq Nielsen

Oqaluttuat arlallit Kangaatsiap Atuarfiani Iparartarfimmi pisunut tunngasut KNR-ip sapaatip akunnerata siuliani saqqummiuppai.

Meeqqanut killissamik qaangiisoqarsimanera oqartussaasuniillu sumiginnarneqarnerat oqaluttuarineqarpoq.

IMAK - Ilinniartitsisut Meeqqat Atuarfianni Kattuffiat - sapaatip akunnerata siuliani marlunngornermi qisuariarput.

Aamma atuaruk Kangaatsiami atuarfik: Angajoqqaat nakuusertoqartarneranik killissamillu qaangiiffiginnittarneq pillugu oqariartuuteqartut

Suliat aalajangersimasut imaluunniit oqaaseqaatit ataasiakkaat meeqqat atuarfiannut nalinginnaasumik atuuttutut isiginnilersitsissanngitsut neriuutigalugu, tusagassiuutinut nalunaarummi allapput.

Naapertuuttumik misissuinerit naammassitinnagit pisortatigoortumillu suliat naammassitinnagit inaarutaasumik inernilersuinerit pinaveersaartariaqartut IMAK-ip kajumissaarutigaa.

KNR ukkatarinnittoq: Kangaatsiap Atuarfia Iparartarfik

KNR-ip meeqqanut killissamik qaangiisumik pissusilersuutit, kinguaassiuutitigut naapertuilluannginnerit nakuusernerillu pillugit oqaluttuat arlallit piffissami tulliuttumi saqqummiutissavai.

Oqaluttuat tamarmik Kangaatsiap Atuarfiani Iparartarfimmi angajoqqaanit meeqqaniillu oqaluttuarineqarput.

Illit imaluunniit nalunngisavit arlaat meeqqat atuarfianni assingusumik nalaataqarsimaguit redaktion@knr.gl-imut attaveqarnissannut tikilluaqqusaavutit.

Kisimiittutut misigisimaguit oqaloqateqarnissannillu pisariaqartitsiguit Tusaanngamut attaveqarsinnaajuaannarputit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit.

Oqarasuaat: 80 11 80

SMS: 1899

Inerniniliiaartoqartariaqanngitsoq

Suliat aalajangersimasut piviusorsiortumik paasiniaalluarnermillu tunngaveqartumik suliarineqarnissaat kissaatigalugu, tamatumanilu meeqqat sulisullu inatsisitigut isumannaatsuunissaat ataqqineqassasoq, Kattuffik allappoq.

- Suliap aamma ersersippaa meeqqat atuarfiat sumiiffinni arlalinni annertuumik tatisimaneqartoq, ilaatigut ilinniartitsisussaaleqinermut, IMAK tusagassiuutinut nalunaarummi allappoq nangillunilu:

- Tamanna ataatsimoorluni aaqqiissuteqarnissanik pisariaqartitsiffiuvoq aamma meeqqat ingerlalluarnissaat pingaarnertut aallaavigalugu kommune, atuarfimmi aqutsisut, sulisut, angajoqqaat oqartussaasullu naapertuuttut qanimut suleqatigiittariaqarlutik.

Aamma atuaruk Kangaatsiami atuarfik: - Atisakka tamaasa piiaqqullugit oqarfigivaanga

Taamaammat kommunit ingerlaavartumik, timitalimmik akisussaassusilimmillu atuarfimmi nakkutilliinissaat pingaaruteqarluinnartoq, ilinniartitsisut peqatigiiffiata erseqqissaatigaa.

- Ajornartorsiutit piaarnerpaamik suussusilerneqarlutillu iliuuseqarfigineqarsinnaaqqullugit; atuartut ingerlalluarnissaat sulisullu sullivimmi avatangiisaat pillugit, kattuffik nalunaarummi allappoq.

Sulisut nersorneqartut

Kangaatsiap atuarfia kisiartaalluni ilungersunartumiinngilaq.

Sulisoqarniarnikkut sillimmateqarniarnikkullu ingammik illoqarfinni minnerni nunaqarfinnilu ilungersunartorsiortoqakulasoq, IMAK-ip aamma oqaatigaa.

Nunalu tamakkerlugu sulisut pissutsini ilungersunartuni tatineqarlutik sulinerminni iliuuseqangaarsimasut eqqaamaqqullugu kattuffiup oqaatigaa.

- Sulisut 1.100-t missaanniittut ullut tamaasa siunnerfeqarluartumik atuartut toqqissisimanartunik ineriartorfiulluartunillu sinaakkutissa qarnissaat anguniartuarlugu sulipput, najukkaminni pissusiviusunut atuuttunut naleqqussartuarlutik, kattuffik allappoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.