IMAK: Aningaasaliissutit ikileqinasigik!
Meeqqat Atuarfianni annertusisamik immikkut atuartitsinerup ingerlanneqarneranut aningaasaliissutit 2007-imi aningaasaliissutinit ikinnerulersinneqarnissaat, 2008- mi aningaasanut inatsisissatut siunnersuummi Naalakkersuisunit siunnersuutigineqarpoq.
Ilinniartitsisut Meeqqat Atuarfianneersut Kattuffiata, IMAK-ip siulersuisuisa oktobarip aqqarnanni ataatsimiikkanik sakkortuumik tamanna akerlilerpaat.
Naalakkersuisoqarfiup naliliinerminut tunngavigivaa Atuarfitsialaap ingerlanneqarlerneratigut pisariaqartitsineq minnerulertussaasoq, tamannali eqqunngitsoq Inatsisartut aningaasanut ataatsimiititaliaanut Naalakkersuisunullu IMAK´-ip maluginiaqquaa.
- Ukiuni kingullerni atuarfinniit paasissutissat takutippaat, annertusisamik immikkut atuartitsinermik pisariaqartitsisut amerliartortut aningaasaliissutillu malinnaanngimata kinguleruttoqalersoq, IMAK taama ilaatigut allappoq.
Aamma meeqqat ADHD –mik nappaatillit amerliartortut saniasigut meeqqat allat atuartitsinermi hold-inilu nalinginnaasuni malinnaasinnaanngitsut amerliartorput. Erseqqissarneqarportaaq innarluutilinnut atuarfinnik pisariaqartitsisoqaraluartoq aningaasaliisoqarsimanngitsorli.
