Imaani ujajaaniartartut tigusaat ulorinartorsiorunanngillat
Umiartortut taakku arfinillit qallunaat umiarsuaanniit assartuummit, Leopardimit, ippassaani qimarngunneqareersullu isumannaallisaanermut paasisimannilluartoq taama naliliivoq.
Nunat Killiit Illersoqatigiiffiata, NATO-p sakkutuui, tamaaniittut, danskit umiarsuaataannut ippassaq anngummata, umiarsuup inuttai piiaasullu peerutereersimapput, piiaasulli umiarsuaq qimaannavissimammassuk aamma eqqumiigaat.
- Taama pisoqarnera nalinginnaanngilaq, siusinnerusukkulli pisarsimasut eqqarsaatigigutsigik, umiarsuarmi inuttat piffissami sivisuumi avaanngusullutik Somaliamiillutilluunniit umiarsuarmiittariaqassapput. Inuunerminnilli navianartorsiornissaat ilimananngitsoq, naalagaaffimmi paasiniaasartut suliffiutaanni namminersortumi, Risk Intelligence-imi, pisortaaneq, Hans Tino Hansen, oqarpoq, nangillunilu:
- Piiaasunut niuerneruvoq, aningaasanimmi pissarsinissartik kisiat taakku eqqarsaatigaat, taamaammat umiartortunut pissuserissaartariaqarput, Hans Tino Hansen oqarpoq.
Umiarsuarmi inuttat umiarsuaatileqatigiiffiup ilungersorluni sumiissusersiniarsarai, nassaarigunikkillu umiartortut taakku arfinillit iperagaanissaat piiaasunut isumaqatigiinniutigilissavaat.
