Ilusilersuinermik Ilinniarfik IA-p ilungersuutiginiarpaa
Aatsitassarsiornermik Ilinniarfik peqatigalugu pilersinneqartariaqaraluarpoq, Ilusilersuinermik Ilinniarfissamut ilinniartussanik amerlasuunik qinnuteqartoqareersimanera eqqarsaatigalugu, Juliane Henningsen allappoq.
-Isumaqarpunga suliap annertuup maangaannarnissaa suleqataasimasunut nunatsinnullumi tamarmut assut uggornartoq, nunatsinni sanalunnikkut ineriartoqqinnissarput piujuaannartitsinissarpullu eqqarsaatigalugu. Pingaartumik kalaallit ilisimasatoqaat puigorneqalersut tassani annertuumik toqqammaviummata, Inuit Ataqatigiit Inatsisartunut ilaasortaatitaat allappoq.
- Ajornanngippallaaqaaq Inussutissarsiutinut Ilinniartitaanermut Naalakkersuisoq (Siverth K. Heilmann, aaqq.) oqarmat: -Neriunarpoq 2009-mut aningaasanut inatsimmi Sanalunnermik Ilinniarfimmut aningaasanik nassaarsinnaajumaartugutâ, Juliane Henningsen oqarpoq, isumaqarlunilu kulturi eqqarsaatigalugu amerlanerusunik aningaasaliisoqartariaqartoq.
-Naalakkersuisut Aningaasanut Inatsisissatut Siunnersutaanni 2008-moortumi takuneqarsinnaavoq timersorneq 1,9 millioni koruuninik qaffaavigineqarniartoq. Inuit Ataqatigiit tamanna akuersaarnartuutissappassuk kulturikkut suliniartut allat illuatungaani aamma qaffaavigineqartariaqarput, Juliane Henningsen allappoq.