Ilungersunartuinnaanngitsut

Ilungersunartut kisiisa pileraangata naalakkersuisuneersut tusagassiuutinik katersortitsisarnerat kisiat isumallutigiunnaarlugu ataavartumik tusagassiortunik katersortitsisarnissaq aningaasanut nunanullu allanut naalakkersuisup, Josef Motzfeldtip siullermeerluni ullumi misilippaa, imalu tunngavilersuivoq:

- Immaqa naalakkersuinermik suliaqartugut qanoq nioqquteqarniartarnermut pissutaasimanerluni naalakkersuinikkut suliaqartugut tusagassiortullu akornanni aatsaat eqiilersutut pisoqartarpoq qulequttatut angisuutut takutitassaqarpasilluta sammileraangatta, Josef Motzfeldt oqarpoq, taamaattumik isumaqarnerarpoq qangalili eqqarsaatigisareerlugu naalakkersuinermik suliaqartut tusagassiortullu sulianik ingerlajuartunik ingerlatsinermut tunngaviusunik ataavartumik akuttunngitsumillu tamanut tusarliisalertariaqartut, namminerlu ingerlatsivimmini ullut tamaasa nutaarsiassaqartarmaat maanna ataasinngornerinnaagallartukkut tusagassiortunik katersortitsisalerniarluni aalajangersimalluni.

Aningaasaqarnermut naalakkersuisoq Josef Motzfeldt aamma oqarpoq soorunami allaffini telefoninilu ulluinnarni ammajuaannartut arlaannillu pinartoqarpat sukkulluunniit saaffigineqarsinnaalluni.