Ilulissat ukiortaamiit qalerallerivittaassapput
Naak, Ilulissani aasakkut sulisussanik amigaateqartoqartaraluartoq ukiortaamiit tunisassiorfik nutaaq qaleralinnik tunisassiortussaq ammarneqalerpoq. Piginnittut isumaqarput akissarsiagissaartitsinikkut sulisussaaleqinaviarnatik.
Ilulissani aalisartunit annermik piginneqatigiiffigineqartoq, qaleralinnut tunisassiorfissaq, ukiortaamiit tunisassiulernissaa siunertaalluni ulluni makkunani toqqammavissaa assallugu aallartinneqarpoq.
Tunisassiorfissaq Ilulissat Fish A/S piginneqatigineqarpoq Savalimiormiumit Jakob Joensenimit, Seth Lyberthimillu piginneqartigiissutip pingajorarterutaa pigineqarluni sinneralu 2/3-dele Ilulissani aalisartunit pigineqarluni.
Ilulissani Royal Greenlandip tunisassiorfia sulisussaaleqijuareersoq qanoq ilillutik sulisussaminnik pissarsisassanersut apeqqutigigatsigu Seth Lyberth ima oqarpoq.
-Tassa aningaasarsiatigut neqerooruteqarsinnaavugut pitsaanerusunik taamaalillutalu aamma ajunngitsorsiassat assigiinngitsut neqeroorutigisinnaallutigit sulisutsinnut.
Qassinik sulisoqarnissarsi naatsorsuutigaasiuk?
Tassa naatsorsuutigaara holdit marluussappata 30-it missaannik sulisoqarsinnaassalluta.
Suliffissarsiuussisarfimmi ningiu Thora Siegstad oqarpoq aasaaneraniinerusoq Ilulissani sulisusaaleqisoqartartoq, taamaammallu tunisassiorfittaassaq aasakkut sulisussaaleqisoqarnerani eqqugaanerusinnaanerarpaa. Ukiukkut decembarimiit februaari ilanngullugu qassinik suliffissarsiortoqartarnersoq apeqqutigigatsigu Thora Siegstad ima oqarpoq:
-Tassani qaammatini 100-it missaanniikkajuttarput saaffiginnittut allassimasuutigisartakkagut appasinnerpaajugamik 100 ataatitalaaginnarlugu kisianni taakkunaniit immaqa 150-it tungaanut immaqa annerpaamik.
Tassa Ilulissat Fish A/S ukioru Ilulissani Royal Greenlandimut unammillerluni aallartikkuni sulisussaqarniarnissaa annilaangatissaqarsorinanngilaq pissanganassaarli aasaraangat sulisussallu amigaataaqqilerpata, sulisinnaasut ikeqisut Royal Greenlandimut imaluunniit Ilulissat Fish A/S-imut suliartorusunnerussanersut.
Thora Siegstad aamma oqarpoq aasakkut aalisakkanik tunisassiorfik kisimi sulisussaaleqineq ajortoq aammali utoqqaat illuat angerlarsimaffinnilu ikiortitut suliffiit sulisussaarusimanerusartut.
