Ilulissat Marathonimi peqataasukippoq

Ilulissani sapaatip akunnerata naanerani Marathonimik arpatsitsisoqarpoq, marluinnaallu tamakkiisumik annguttuusut oqaatigineqarpoq.
aggustip 04-at 2008 08:12

Lars Svinth Nielsen, Nuuk Marathonimi ukioq kingulleq ajugaasoq, Ilulissani arpannermi angutini aamma ajugaaqqippoq, arnanilu Riikki Mathiassen ajugaasoq, aviisimi Sermitsiami allaaserineqarpoq.

Arpatsitsinermi katillugit inuit 60-it peqataapput, amerlanerilli arpaffissaritaasup affaanut arpapput.

Oqaatigineqarpoq Marathonimi ukioq manna arpaqataasut siornamut sanilliullugit ikinnerusimaqisut, tassami siorna inuit 198-it arpaqataasimapput.

Peqataasut taama ikitsiginerannut aaqqissuisunit patsisaatinneqarpoq arpatitsinerup feeriap nalaani ingerlanneqarnera.

Arpaffik Ilulissat timersortarfianiit mittarfiup tungaanoorpoq, 42 kilometerimullu anngutissagaanni aqqut taanna sisamariarlugu arpanneqartussaasimalluni.

Lars Svinth Nielsenip 42 kilometerimut arpannermini nalunaaquttap akunneri marluk minutsillu 52-it atorpai, arnanilu Riikke Mathiassenip nalunaaquttap akunneri sisamat minutsillu 25-t atorsimallugit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq