Ilulissat kommuneata raajat eqqaassanngikkaanni aalisarnerup qaleraliinnarnik aallaaveqartinniarneqarnera illersoruminaatsileraa, Ilulissani borgmesteriugallartoq Bendt Broberg Kristiansen tusagassiutinut allappoq.
- Qaleralik siunissamut isumalluutaasinnaajunnaaraluttuinnarpoq aammalu qaleralik milliartorpoq aalisartullu qaleraleqarfinni amerlavallaartarput, Bendt Broberg Kristiansen allappoq. Taanna erseqqissaavoq, taama isumaqarneq qaleralinniarnermi susassaqartunit tamanit isumaqataaffigineqartoq.
- Aalisakkat maanna aalisarneqanngitsut isiginiarneqarnerusariaqarput, soorlu suluppaakkat, saarullik kiisalu eqalussuit neqaat qimminut nerukkaatissatut tunisaalersinnaapput, Bendt Broberg Kristiansen allappoq.
Taanna aamma kajumissaarivoq inuussutissarsiorneq maannakkutut iluseqarluni ingerlaannarsinnaanngimmat aalisartut ilaat inuussutissarsiutinut allanut piukkussarneqartariaqartut.
- Takornarialerineq uuliasiornerlu innuttaasunit sapiissuseqarfigalugit ikaarsaariarfiginissaat piffissanngorpoq, Bendt Broberg Kristiansen naggasiivoq.
Qaammatip ataatsip matuma siorna Ilulissani aalisartut tusarliipput, Ilulissat kommuneani aappaagumiit qaleralittassiisoqartariaqaraluartoq.