Ilulissat kangerluani arpanneq soqutineqarluarpoq

Ulluni pingasuni arpanneq Kangia Race ukiup aappassaa Ilulissani ingerlanneqartussaq juunip qulingani aallartissaaq maannamullu soqutineqarlualereerpoq.

- Maannamut iligiit 18-it nalunaarput arpattussat 40-uullutik. Kisianni piffissaq kingulleq atorlugu nalunaartoqassajunnarsivoq taamaammat ilimagaarput peqataasoqarluarumaartoq, aaqqissuisuniit Rigmor Villadsen KNRimut oqarpoq.

Ullut pingasut ingerlaneranni peqataasut 45 kilometerit arpaffigissavaat. Ulloq siulleq Ilulissaniit piniariat illuaraannut Aallaaniarfimmut arpattoqassaaq Ilulissat kangerluaniittumut. Ullup aappaa Ilulissat timaallugit Aallaaniarfimmiit Kangerluarsummut arpattoqassaaq.  Ullorlu kingulleq Kangerluarsummiik Ilulissanut arpattoqassaaq.

Upernarumaataarnera Ilulissani aamma malunnarpoq suli arlalinni aputeqangaatsiarluni.

- Assut pissanngatigaarput arpanneq ingerlanneqalerpat qanoq aputeqartigiumaarnersoq. Aallaaniarfik tuperfiginnerpaajunngilaq ullulli aappaani Kangerluarsummi periarfissaginnerulluni, Rigmor Villadsen oqaluttuarpoq.

Sillimaniarneq eqqarsaatigalugu peqataasut 18-ileereersimanissaat aaqqissuisut piumasaraat. Peqataasut pinngitsooratik aamma nassartussaavaat vhf radio, tupeq, siniffiup puua, taqussat, atisassamaatit, sumiissusersiut kiisalu mattutit nipinnertuut. Nunap assiganik peqataasut nassatassaannik aaqqissuisut isumaginnittuussaapput. Atortut aqqutaa tamaat peqataasut nammattakkami nassatarissavaat.

Siorna Kangia Race ingerlanneqarmat peqataasut iligiit 27-upput arpattut 61-ullutik.