Ilulissat innaallagissamik mingutsitsinngitsumik pilersorneqalerpoq
Ullumimiit Ilulissani innuttaasut innaallagissamik minguitsumit pilersorneqalerput. Tamanna pivoq Paakitsumi erngup nukinganik nukissiorfiup innaallagiaq pilersitaa Ilulissani illoqarfimmut ikkunneqarmat. Erngup nukinganik nukissiorfiup sarfaliutaasa pingasuusut ilaat ataaseq maannakkut avatangiisinik mingutsitsinngitsumik innaallagissiorluni aallartippoq.
- Ilulissani pisisartut ilisimatinneqareerput ikkussinerup kingunerisaanik sivikitsumik innaallagissap qamittoortarsinnaaneranik, taama Nukissiorfiit attaveqarnermut iliuusissanut aaqqissuisuat Anja Rosa Qvist ilisimatitsivoq.
Paakitsumi erngup nukinganik nukissiorfiup pisortatigoortumik ammaanersiorneqarnissaa 2013-imi ukiakkut pissaaq. Taamanikkornissaanut Paakitsuni erngup nukinganik nukissiorfiup ingerlanneqarnera Nukissiorfiit Ìstak-imiit tigussavaat. Paakitsumi erngup nukinganik nukissiorfik tamakkiisumik ingerlalerpat Nukissiorfiit Kalaallit Nunaanni piujuaannartitsineq tunngavigalugu nukissiuumik tunisassiornerata 70 procentia mingutsitsinngitsumik ingerlanneqalissaaq.
Erngup nukinganik nukissiorfiup atulernera Ilulissani innaallagissamut akigitinneqartup allangortinneqarneranik kinguneqassanersoq naluneqarallarpoq.