Ilulissat asfalterneqarnerat puitsuungatitsivoq
Kommunalbestyrelsiusimasormi siorna missingersuusiorami aalajangersimagaluarpoq Upernavimmi 1 million koruunit taamatullu aamma Uummannami 1 million koruunit atorlugit aqquserngit ukioq manna iluarsaanneqassasut. Taakkualu saniatigut aamma Aasianni aqquserngit 5 million koruunit missaannik aningaasaliiffigineqarlutik asfaltilersorneqarnissaat aamma aalajangiunneqarsimagaluarpoq. Taakkuali ukioq manna suli aallartinneqanngillat:
- Tupinnarneruvoq imaluunniit pakatsinarneruvoq aamma paasillugu Ilulissanigooq aqquserngit tassa suliaralugit asfaltilersorlugit aallartinneqarput. Tupigusunninnut peqqutigivara aamma kommunalbestyrelsemi ukioq kingulleq ukioq mannamut missingersuusioratta Ilulissani aqquserngit suliarineqarnissaat aningaasaliiffiginikuunnginnatsigu, Peter Olsen (IA), Qaasuitsup Kommunalbestyrelsiani ilaasortaq, oqarpoq.
Peter Olsenip Qaasuitsup Kommuniani borgmesteri allakkatigut ammasumik apeqquteqarfigaa sooq aningaasaliiffigineqareersimasut aallartinnagit, Ilulissat aningaasaliiffigineqarsimanngitsoq asfaltilersorlugu aallartinneqarsimanersoq:
- Taamaattumik aamma taanna assorsuaq eqqumiigalugu aamma paaserusullugu qanoq ililluni taanna aningaasalersorneqarnersoq nassuiaaqqullugu ilaatigut borgmesteri allaffigivara, Peter Olsen oqarpoq.
Aningaasat Upernavimmi, Uummannami Aasiannilu atugassaagaluit, Ilulissani ilumut atorneqarsimanersut Ole Dorphimut akissutissarsiniaraluarpagut, taannali angalammat oqaaseqartinngilarput.
Qaasuitsup Kommuniatali teknikkeqarnermut immikkoortortaqarfia KNR-imut ilisimatitsivoq Sanaartornermut Avatangiisinullu Ataatsimiititaliaq ileqquusumik juunip 28-ani ataatsimiinnermini aalajangersimasoq Ilulissani asfaltilerineq ingerlanneqassasoq Ilulissani asfalterilerineq kommuunimut aningaasatigut isertitsissutaasinnaammat. Nukissiorfiimmi Ilulissani nukissiorfittaarnerup kinguneranik aqqusinernik annertuumik assaanerat suliffeqarfiillu allat aamma aqqusinernik assaasarsimanerat kommuunimit asfalterisoqareerpat akiligassanngortinneqartussaammata.
