Ilulissanut tikeraarpassuit

Nunaqarfimmut inuussutissarsiornikkut ingerlalluartumut Oqaatsunut allartitat tikeraassapput, taavaniinnerminni kommunip akiligaanik nerrisissallutik.

Illoqarfimmut utersimaleriarunik Perorsaanermik Ilinniarfimmut SPS-imut pulaassapput kingornalu Royal Greenlandip suliffissuanut takornariartinneqassallutik.

Aallartitat Danmarkimut aqagu utissapput. Aallarpata tikeraat allat taarsissavaat, tassami issittumi nunallit avatangiisinut ministerii ataatsimeersuassammata.

Avatangiisinut ministerit nunanit arfineq-pingasuneersuupput - USA, Canada. Norge, Sverige, Island, Finland aamma Danmark, Danmarkip Kalaallit Nunaat aamma Savalimmiut peqatigalugit.

Ataatsimiinnermi eqqartugassaasa pingaarnersaasa ilagaat, issittup imartaani avatangiisit ullumikkut qanoq innerat aamma qanoq silap allanngoriartorneranit sunnerneqarnerata illersorneqarsinnaanera.

Aamma umiarsuit allallu imaatigut angallassissutit issittup imartaanut qanoq sunniuteqarnerat oqaluuserisassanut ilaassaaq.

Naalagaaffiit Peqatigiit immallu pissusaanik ilisimatuut avatangiisinut ministerinik siunnersuisuussapput. Ataatsimiinnerup siunertaraa issittup imartaa pillugu suliniutissanik isumaqatigiissuteqarnissaq.