Ilulissani unnuisariaqalerput

Kangerlussuup nalaani silaannaap ullumi aalarulunnerata kingunerisaanik timmisartorsuaq Norsaq missinnaasimanngilaq, Danmarkimullu utiinnartariaqalerluni. Illoqarfiit ukiuusartut, Nuummi ataatsimeersuarneranni peqataasut ilaat 80-it nunaminnut utertussaagaluarput, allatulli maanna iliortariaqalerput, taarsiullugulu Air Greenlandimit misigisaqartinneqarlutik.
Allattoq Mads Lynge
januaarip 21-at 2008 15:54

Ataatsimeersuarnermi peqataasut aqqaneq-marluk suli Nuummiipput, allalli 80-it Dash 7-inut marlunnut ilaallutik Kangerlussualiaanneqaraluarnerat iluatsinngimmat, Air Greenlandip suligasuarneratigut Ilulissiaanneqarput:

- Nuuk takoreermassuk, taarsiullugu Ilulissiaanneqarnissaat aalajangiupparput, Air Greenlandimi timmisartuussisarnernut pisortaq Jørgen Erik Andersen oqarpoq.

Ullumi ulloqeqqanut qiteqqutilersoq timmisartut marluk Ilulissat timmisartoqarfianut mipput, ilaasullu bussimik Hotel Hvide Falkiliaanneqarlutik. Igasoq Thailandimeersoq Thailandimiut ulloqeqqasiutigisartagaannik pillerpoq.

Air Greenlandip Ilulissani pisortaa Maria Rafn oqarpoq, illoqarfiup avataa ulluni kingullerni sikuersimasoq, ilaasullu ilulissanik alutorsaqalutillu assiliisaqattaartut.

Radioaviisi aallartingajalersoq Air Greenlandimit nalunaarutigineqarpoq ilaasussat 80-it Ilulissani unnuisariaqalersut, Kangerlassuarmi sila taamaaginnarmat.

Ilaasut Air Greenlandip timmisartuutaanut Kununnguamut Norsamullu ilaallutik aqagu Københavniliaanneqassapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq