Assi: Kathrine Kruse

Ilulissani takornarialerisut silamit eqqornerlunneqartut

Ilulissani takornarialerinermik suliaqartut ilaat marluk, aasap ingerlanerani pujortarnera sikoqarpallaartarneralu pissutigalugu takornariartitsinissaraluaminnit taamaatitsiinnartarnerminnit 800.000 koruunit tungaanut annaavaat.

Takornariartitsisarnermik suliaqartut marluk Ilulissani aasap ingerlanerani pujortarnera aamma iluliaqarpallaartarnera pissutigalugu takornariartitsinissaminnik unitsitsiinnartariaqartarsimapput. Ilaatigut misigisassarsiorfigissallugu nuannarineqarluartumut, Ilulissat avannaatungaani inissisimasumi illuaraqarfimmut Eqimut, iluliaqarpallaartarnera pissutigalugu angallassinissaangaluit arlallit taamaatiinnartariaqarsimavaat. Aamma arfernik takusassarsiortitsilluni angallassinissaangaluit arlallit sikualoqarpallaarnera pissutigalugu taamaatiinnarneqartariaqartarsimapput.

Takornariartitsisartullu marluk eqqorneqartut aappaat, World of Greenland, takornarianut 500.000 koruuninik utertitsiinnartariaqarsimavoq.

- Aasap aallartinnerani sikoqartorujuunera aamma pujornera pissutigalugu arlalippassuarnik taamaatitsiinnarnikuuvugut, Ilulissanut eqqaanullu takornarianut misigisassarsiortitsisarfimmi, World of Greenlandimi, takornariat misigisassarsiortittarneranni pisortaq, Jakob Schytz, taama oqarpoq.

Aasaanerani takornariat misigissarsiortinneqartarnerat juunimi aallartimmat, ilaatigut Ilulissat avannaatungaani takornarianut illuaraqarfik, sermip iigartarfiata Eqip akianiittoq, ukiup sikuata suli katassimannginnera pissutigalugu ullormi siullermi aamma tikinneqarsinnaasimanngikkallarpoq. Aasaaneranilu aamma misigisassiorfittut tikinniarnera sermip iigartarneranit sikoqarpallaartarnera pissutigalugu takornariartussaangaluanut taamaatitsiffiuinnartariaqarsimavoq.

- Eqimut qanillattorsinnaasarsimanngilagut, taamaallaat 14 kilometerisut qanillitigisinnaasarsimallutigu. Taamaattumik ajoraluartumik angalanerit unitsiinnartariaqartarsimavagut, Jakob Schytz oqarpoq.

Arfernik takusassarsiortitsisarnerit aamma eqqorneqartut

Tamatuma saniatigut Ilulissat illoqarfiata saani aasaq manna iluliaqartarlunilu sikualuppassuaqartarsimavoq. Tamannalu arfernik takusassarsiorniartunut aamma eqquisimavoq.

- Tassani Ilulissat silatinnguani imaluunniit Paakitsup eqqaani angalanerit 16-it unitsiinnartariaqarnikuuvagut, Jakob Schytz oqarpoq.

Iluliaqarpallaartarnera kisimi ajornartorsiutaanani aamma aasap ingerlanerani pujortarnera pissutigalugu World of Greenlandip takornarianut angallassinissaraluani sisamat aamma maannamuugallartoq unitsiinnartariaqarsimavai.

- Aasaq manna takunikuuarput ullaat tamangajaasa pujortorujuunikuulluni aatsaat kingorna qaangiuttartoq, Jakob Schytz oqarpoq.

Taamaalilluni World of Greenlandip aningaasat 500.000 koruunit missaani isertitassaraluani annaavai. Takornarialeraluni suliffeqarfik alla, Ilulissat Tourist Nature, arfernut takornariartitsilluni angallassinissaminut aamma angallassinissanut allanut unitsitsiinnarnermini 300.000 koruunit tungaannut annaasaqarsimavoq. Angallassisartut allat, KNR-imit attavigisagut, angallassisarnerminni taama annertutigisumik annaasaqarsimanatik oqarput.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat