Ilulissani suliffissaaleqisut amerleriarujussuarput

Sikuniarnera illoqarfimmilu sanaartornerup unittooqqanera Ilulissani januaarimi suliffissaaleqisut amerleriarnerannut patsisaasoq kommuunimit oqaatigineqarpoq.

Suliffissaaleqinermillu eqqungaanerpaapput sanaartornermik suliallit, aammalu qalerallerivimmi raajaleriffimmilu sulisut.

- Suliffissaaleqisut Ilulissani qaffariaateqarnerat peqquteqarpoq aalisakkanik tunisassiorfiit sulisunik angerlartitsigallarnerinik aammalu sanaartornerup uninngagallarneranik. Kathrine Petersen Qaasuitsup Kommuniata Ilulissani suliffissarsiuussisarfianeersoq oqarpoq.

Suliffissaaleqisullumi amerlariarnerat ilutigalugu, suliffissaaleqisunut kommuunip ikiorsiissutigisartagai malunnarluartumik amerleriarput. Tassa januarimiinnaq millionit sinnilaarlugit ikiorsiissutigineqarsimammata, siorna taamaalinerani millionit affangajai ikiorsiissutigineqarsimasut.

Kommunimiillu suliffissarsiortut qanoq iliuuseqarfigineqarnissaat pilersaarusiorniarneqalerpoq.

- Sapaatip akunnera inuttut ineriartorneq ingerlappoq. Taavalu tuluttut pikkorissaanerit sapaatip akunnerini marlunni ingerlanneqarlutik. Ullunilu tulliuttuni pilersaarusiorluarniarsarivugut suliffissaaleqisut qanoq ingerlateqqinniarsinnaanerlutigit,Kathrine Petersen oqarpoq.

Sanaartornermilli suliaqartunut nuannersumik Naalakkersuisut nuannersumik sapaatip akunnerata siuliani tusarliussaqarput, tassat inissiat 24-at aasamut sanaartorlugit aallartinniarneqalermata.