Ilulissani sikuarpassuaqarnera kiatsikkiartornerup ilagaa
Sermersuup napisarfia massakkut ima ilummunarsimatigaaq allaat nunap qaani sermersuaq ilanngartalersimalluni. Taamaattumik iluliarsuit kaanngartut kaavigussaaqqaarlutik imaanut nakkartalernikuupput, sequmigarnerulernikuullutillu taamaammat makkua isigisagut iluliaaqqat minnerisut takussaanerulerput.
Dorthe Dahl Jensenilu oqarpoq iluliarsuit nunap qaani ilanngartartillugit taamatut iluliaaraaqqanik takusaqarnerulissasugut. Ukiukkulli issitsillugu naatsorsuutigaa annerusunik ilanngartarsimassasoq taamaammallu iluliarsuit annerit aamma takussaasassasut.
Kisiannili tassa issinnerusaleqqinngippat ilulissat seqummakuunerusut takussaanerussanerarpai.
Tusaramiuk aalisartut qaammatini marlunni aalisarluarsinnaasimanngitsut oqarpoq, arraa ilumuut, tassami allatut ajornaqaaq taamaalertussaasimassaaq, Dorthe Dahl Jensen oqarpoq.
Kangia sermersuullu ilanngartarnera malinnaaffigeqaarput ukiullu tamaviisa ilisimatuut malinnaaffigersuarpaat kangia. Tassami sermersuarmiit aniasut Kangiani annertusaqimmata, sermersiooq oqarpoq.
Dorthe Dahl Jensen isumaqarpoq sikuarpassuit, tassa iluliaararpassuit miligussisarnerat siunissami ajornartorsiutaalersinnaasut.
Pinngortitarsuaq nukittoqigami iluliarsuillu imaaliallaannaq illikartinneqarsinnaanngimmata allatut ajornaqaaq taamaakkaangat akueriinnartariaqassavarput, taamatut oqarpoq sermersiooq Københavnillu universitetiani professori Dorthe Dahl Jensen, Ilulissaniit Oqaatsunut ingerlaartillutik. Taanna aamma issittumi inatsisartunut ilaasortanut Oqaatsumi oqalugiartussaavoq.
