Ilulissani qimmit toqunneqatarsimasut

Johan Villadsenip qimmii marluk januaarimi februuarimilu toqutaapput, kingullerlu ippassaani toqutaalluni. Kingulliulluni toqutaasoq angisuumik ikeqarmat aallaammik sakkortuumik toqunneqarsimanissaa piginnittuata ilimagaa.

- Qimmeq pitoqqasoq aallaasimavaa, qungasequtaalu peeriarlugu uniarlugu qimmilivimma ungataatungaanut ilisimallugu. Siulleq aamma aallaatissimarpasippoq sakkukinnerusumilli aallaammik aallaatissimagami aanaarpallaarsimanngilaq, Johan Villadsen oqaluttuarpoq.

Qimmip qiterliup toqujartornera arriinnerusimavoq.

Illoqarfimmi qimmiutillit allat assingusumik misigisaqartarsimanersut Johan Villadsenip ilisimanngilaa.

- Kisianni imaassinnaavoq taamaattoqartarnera nipangiutiinnarneqartartoq. Tamannarpiarmiuna pillugu uanga aviisimut Iluliarmiumut e-mailikkut allattunga, taamaattoqarnera avaanngunarpallaaqimmat.

- Patsisaa nalulluinnarpara kisianni piukkuttaleraluarnikuugama avannaata qimussersuanut anngunniuttunut peqataanissannut, kisianni qimmikka siulliit marluk toqummata peqataanissaraluara tunuartiinnarnikuuara, Johan Villadsen oqaluttuarpoq.

Johan Villadsenip qimmii 14-iusimagaluartut maanna qulingiluaannanngorput, pingasullu toqutaasut qimussinik ingerlaarnerup nalaani ilaminnut qiimmassaasutut siulliutinneqartarsimagaluarput. Johan Villadsenip qimmini inatsisit naapertorlugit qimmilivimmini pitussimatittarpai.