Ilulissani qaleralleriffik sulisussaaleqivoq

Ilulissani sulisussarsiortoqanngilaq taamaattorli tunisassiorfik sulisunik 30-nik amigaateqarpoq, taamaammat Ilulissani IA isumaqarpoq nutsertitsinermut aningaasaliissutissat atorlugit Ilulissani sulisussat inissaannik sanaartortoqartariaqalersoq.

Ilulissat ukiuni arlaninngortuni sulissanik amigaateqarfiusarpoq, massakkullu ajornartorsiutip qaleralilerineq eqqorpaa, naak, tisassummik maskiinamik inuit arfineq pingasut suliassaat inunnit marluinnarnik isumagineqarsinnaagaluartoq, taamaattoq qalerallit tunisassiarineqarsinnaasut tamarmik suliarineqarsinnaanngillat, Tunisassiorfiup pisortaa Allan Jensen ima oqarpoq:

Aasaanerani massakkut qaleralileriffimmi sulisut 30-t amigaatigaagut kommunemilu suliffissarsiortoqarnani.

Qanormi iliussavit? Allan Jensen aperaarput akivorlu, periarfissaq ataasiinnaasoq tassalu tunisassiorsinnaaneq appartissallugu.

Qanoq appartissaneraa aperigatsigu oqarpoq qalerallit qeritiinnartariaqassasut.

Ilulissani IA isumaqarpoq ajornartorsiut aaqqiiviginiarneqartariaqartoq, siulittaasuat Bendt B. Kristiansen ima oqarpoq:

-Naalakkersuinikkut aningaasaliissutit nutarsinnaanermut aningaasaliissutinik taaneqartut isumaat siunertaat aallaavigilluinnarlugu fabrikkemi maani sulisussaaleqineq aaqqinneqartariaqartoq Inuit Ataqatigiit isumaqarpugut tassalu sulisussanik pisariaqartitsiviusunut nuttartoqarnissaanik naalakkersuisut siunertaat naammassineqartariaqartutut Ilulissani isumaqarfigilluinnarparput.

Tamatumunnga Tunisassiorfiup pisortaa Allan Jensen ima oqarpoq:

Isumaq ajunngilluinnarpoq tunisassiorfimmi kisimi sulisussanik pisariaqartitsisinnaanngilaq.

Naalakkersuisoq nuttarnissamut aningaasaateqarfimmut oqartussaasoq ullumikkut oqaaseqartissinnaasimanngilarput.