Ilulissani oqartussaaqataaneq akisussaaqataanerlu
Qaasuitsup Kommuniani pilersaarusiorfik ataatsimiititsinissamut aaqqissuisuuvoq, innuttaasullu kommunimi ineriartornermut aamma pilersaarusiornermut isumaat tusarusunneqarlutik.
Sermermiuni ataatsimiititsinermut peqataasut, Ilulissat illoqarfiata assinganik saqqummiussiffigineqassapput, illoqarfimmilu pitsanngorsaatissanik siunnersuuteqarsinnaatitaajumaarput soorlu aamma isornartorsiuinernik saqqummiussisinnaajumaarlutik.
Pilersaarusiornermi iliuuseqarfigineqartussat aamma oqallisigineqassapput, soorlu takornariaqarnermut tunngasut, ilinniartitaaneq aamma kulturi.
Innuttaasut ataatsimiinnermi kissaatigisatut saqqummiussatik pingaarnersiussavaat, pingaarnerillu pingasut kommip pilersaarusiorneqarnissaanut ilanngunneqassapput. Qaasuitsup Kommunia pillugu pilersaarut 2012-imi innuttaasunut tusarniutigineqassaaq. Akuerineqariarpallu kommunalbestyrelsemut 2013-imi ilaasortanngortunut tunniunneqarumaarluni.
