Ilulissani Nuummilu mittarfiit tallineqarnissaat pillugit siunnersuummik Naalakkersuisut piumaffigineqarput
Naalakkersuisut ippassaq ullaap tungaani piumaffigineqarput, Inatsisartut upernaaru ataatsimiilerpata Ilulissani Nuummilu mittarfiit tallineqarnissaat pillugit siunnersuummik saqqummeeqqullugit.
novembarip 15-at 2007 05:29
Qaqortumi suluusalinnut mittarfiliorsinnaanermut periarfissat aamma misissoqquneqarput. Tamanna Inatsisartuni, Siumumit, Atassummit, IA-mit Anthon Frederiksenimillu amerlanerussuteqarluartunit akuerineqareerpoq.
Ilulissani Nuummilu mittarfiit tallinissaannut atatillugu piumasaqaataavoq, aningaasartuutissat atorniarnikkut Kalaallit Nunaatalu avataaniit aningaasaliisoqarneratigut pissarsiariniarneqassasut.
Angallanneq pillugu oqallinnermi, aalajangiinermi tunngavigineqartut Demokraatinit isornartorsiorneqarput. Tassa mittarfiit ataasiakkaat pinnagit timmisartuussineq ataatsimut isigalugu misissuisoqarlunilu naliliisoqartariaqarnera piumanerugamikku oqaluuserisassap pingajussaaneerneqarnerani akerliullutik taasipput.
