Ilulissani napparsimmavik sipaarniartariaqassaaq
Dronning Ingridip Napparsimmavissuaniinnaanngitsoq, Ilulissalli napparsimmaviani aamma sulisussaaleqisoqarpoq. Sulisut taarseraattorujussuupput, aningaasatigullu ingerlanerliortoqarluni. 2,3 millioni koruuninik sipaarniartoqartariaqassasoq, napparsimmavimmi ningiu Arnannguaq Blytmann oqarpoq.
Allattoq Mads Lynge
februaarip 11-at 2009 16:30
- Uagutsinuut ilungersunartorujussuuvoq. Ingerlatsinermut aningaasartuutit siornatigut sipaarniarfigineqarnikuupput, qanorluunniillu ilioraluarutta sipaarniarfigeqqissinnaanngikkaluarpagut, Arnannguaq Blytmann oqarpoq, nangipporlu:
- Suliassagut annikillisaavigineqartariaqassapput, inuttassaqartinnginnerat pissutaalluni. Soorunami ilungersunanngitsuunngilaq. Ilulissat napparsimmaviat qitiusumik Avannaani napparsimmavinngortinneqarnissaa pilersaarutaagaluarpoq, sipaarniuteqartariaqarnissarlu tassunga tulluutinnglaq, Ilulissat napparsimmavianni ningiu Arnannguaq Blytmann oqarpoq.
Peqqissaasut qulingiluat Ilulissat napparsimmavianni sulisorineqarput. Arfineq-pingasut taartaapput, ataaserlu aalajangersimasumik atorfeqartuulluni.
