Ilulissani ivigaasanik arsaattarfissaq aallartisarneqalerpoq
- Isikkamik arsarnermi unammillernerusinnaanissarput anguniarlugu aallartippara, Knud Fleischer
Ilulissani ivigaasanik arsaattarfeqalernissaanut inuttut nammineq suliniuteqartoq , Kattusseqatigiillu sinnerlugit Inatsisartunut ilaasortaq taama oqarpoq.
Ivigaasalimmik arsaattarfik Ilulissani pilersinniarneqartoq nunarsuarmi arsaattarfiit kattuffissuata FIFA-p akuerisaatut angissuseqartussaq ukiut tallimat pingasulluunniit akornanni pilersinniarneqarpoq. Maannamullumi 150.000 koruuninik suliniuteqartut tapiiffigineqarnissaat neriorsuiffigineqareersimalluni
- Aningaasat pappiaranngorlugit tigummisakka, atorfissaqalerpatalu nakkartinneqartussat 150.000 koruuniupput. Taassuma saniatigut nalunngilara aamma allat aningaasaliiffiusinnaasut aningaasaleerusuttullu piareersimasut. Taamaattumik aningaasarpaaluupput maannamut sillimmataareersut, Knud Fleischer oqarpoq.
Nunatsinnilumi arsaattartut kattuffiannit pilersitsiniartut tapersersorluarneqarput.
- Nuannaarutigivarput taamatut suliniarlutik aallartinnerat, arsaattartullu Kattuffianninngaanniit tamakkiisumik tapersersorpagut. Aammalu sutigut arlaatigut siunnersorneqarnissamik ikioqatigiinnissamilluunniit piumasaqarpata piareersimavagut ikiuunnissatsinnut, Lars Lundblad Nunatsinni arsartartut kattuffianni siulittaasoq oqarpoq.
Ivigaasalimmik arsaattarfik qanorpiaq isikkoqassanersoq aammalu tamakkiisumik qanoq akeqassanersoq suli missingersorneqanngilaq:
- Kisianni tassa aasaru, aggustip pingajuani, sisamaani tallimaanilu, maani illoqarfimmi festivalertitsissaagut ilaatigut talittarfimmi, Sermermiuni kiisalu SPS-imi. Tassanilu aningaasat isaatinneqartut tassungarpiaq tamarmik nakkakaatinneqassapput, Knud Fleischer oqarpoq.
Knud Fleischerip Ilulissat Kommuunerisimasaani kommunalbestyrelsemi ilaasortaanermi nalaani 2001-imi Ilulissani ivigaasalimmik arsaattarfeqalernissaa siullermik siunnersuutigisimagaluarpaa.
Ilulissani ivigaasalimmik arsaattarfimmik suliniuteqaqataasut maannamut Knud Fleischerimik, Nuka Kleemann-imik, Svend Damgaard-imik kiisalu Ilulissani Pisiffimmi pisortamik Lars Andersenimik inuttaqarput.
