Ilulissani ilungersunartorsiorput
Qaasuitsup kommuniani borgmesterip Namminersorlutik Oqartussat sanaartugassanut pilersaarutaasunut tunngatillugu atsiornissaannut tuavisaarpaa.
- Massakkut paaserusutsapparput illoqarfiit pingaartumik taakkua sisamat annerpaamik sanaartorfigineqartussatut siunnerfigineqarsimasut ilumut Nuuttulli pingaartinneqartiginersut? Tassami maani sanaartorneq unittoorpoq, aamma kommunitut nuanniigisarujussuatsitut nuanniigisarujussuatsinnik maani sulisitsitut peqatigiiffiannit oqarfigiartorneqarpugut, tassa inuit 100-120 suliassaarunneq pissutigalugu soraarsitaasussanngortut. Tamanna Namminersorlutik Oqartussat kigaappallaamik suleriaaseqarnerata kingunerisaanik pisoq, borgmester Jess Svane oqarpoq.
Sanaartugassanut pilersaarutit isumaqatigiissutigineqarlutik aningaasaliiffigineqareeraluarput, soorlu Ilulissani atuarfik Mathias Storchip nutarterneqarluni allilerneqarnissaa.
Borgmesterili Namminersorlutik Oqartussat pilersaarutaanut tunngatillugu anersaaruluuteqarpoq.
- Naalakkersuisoq ataatsimeeqatigereerlugu tamarmik piareerput, kisianni aamma tassa ajornartorsiutigilerparput Namminersorlutik Oqartussat atsiornissaat taakkununnga tunngatillugu, borgmester Jess Svane oqarpoq.
Qaasuitsup kommunianit sanaartugassatut pilersaarutit Namminersorlutik Oqartussanit akuerineqartussatut utaqqineqartut makku assersuutigaat:
Nunaqarfinni pingasuni atuarfiit pingasut iluarsaanneqarnissaat, Ilulissani inissialiornissamut tunngasut aamma illoqarfinni pingasuni utoqqaat illuinut tunngatillugu aningaasalersuinissamut tunngasut.
Qaasuitsup kommunianili suli utaqqiuartoqarpoq.
-Ajoraluartumik uatsinnut kinguarsaataalersimavoq. Naalakkersuisup oqaloqatigisarnera ajunngilaq aamma aningaasat atorneqartussatut akuerineqareerput, kisianni pappiliarsornikkut uagut piareernikuugaluarluta Namminersorlutik Oqartussat massakkut utaqqiinnalerpagut, borgmester Jess Svane KNR Avannaani suleqatitsinnit apersorneqarluni oqarpoq.
