Ilulissani hoteli nutaaq: Tulluusimaarnaqaaq
- Tulluunnartorujuuvoq. Imaannaanngitsumik anguniarsarivarput. Naggataavatigut iluatsillugu, Tommy Bagger Oqarpoq.
Ilulissanimi akunnittarfinni ukioq manna ukiup affaani siullermi 34.000-it tungaanut amerlassusillit unnuisimapput. Mittarfissuaqalerpallu suli amerlanerit tikittarnissaat naatsorsuutigineqarpoq.
Taamaammat qatanngutigiit Tommy aamma Frank Bagger - Jens Salling peqatigalugu hotelimik sanaartortitsileruttorput.
- Takornariarpassuit maanga tikittarput. Inissaaleqisut nalunngilagut. Pikani mikisuaqqamik Bed and Breakfastiuteqaratta atorneqarluartorujussuarmik, Tommy Bagger oqarpoq.
Siunissami hotelimik sanaartortitseqqinnissaat qatanngutigiit isummerput.
- Nalunngilarput mittarfittaarnialertugut. Taamaammat hotelerpassuit pisariaqarput. Uagut ataasiinnaavoq, sulili allanik takkuttoqaqqissajunnarsivoq, Tommy Bagger oqarpoq.
Hotelip pulaartui qanoq isikkiveqalernissaat droninik atorlutik takorluuisimapput.
- Assorsuaq isikkiviginnissaa naatsorsuutigivarput soorunami. Droninik takullattaarnikuuarput portussussaa naapertorlugu.
Hoteli 110 millionit koruuninik akeqartoq
Hotelissaq quleriinni tallimaasuni 78-nik ineeraqassaaq, soorlu qullerpaami neriniartarfeqarlunilu aneerasaartarfeqarniartoq. Hoteli takornarianit atorneqarnerunissaminut pilersaarutaangaluarluni aamma inunnut 25-t tungaanut naammattumik ataatsimiittarfeqassaaq.
Hotel Ilulissat sananeqarnera 110 imaluunniit 120 milliuunit koruunit akornanni akeqarnissaa naatsorsuutigineqarpoq.
Maajip 15-iani 2021-imi ammaanersiortoqarnissaa Tommy Baggerip naatsorsuutigaa.