Ilulissani eqqagassat 50 tonsit katersorneqartut
Ilulissat iluliarujussuaqarneranik ilisimaneqarluarpoq tamannalu takornarianik tusindilikkaanik ussatigineqartarpoq. Aqqusinerni eqqagassat, biilikut eqqagarujussuillu qimaannakkat isikkivigissuarlu imminnut tulluutinngillat.
Kommuni, nammineq kajumissutsiminnik ikiuuttut suliffeqarfiillu illoqarfimmi maajimili saliiniarsaripput. Tamatumani takornariat kisiisa pingaarnerutinnagit illoqarfimmiulli pinerullugit, teknikkeqarnermut pisortaq, Nick Nielsen oqarpoq.
- Isumaqarpunga takornariat innuttaasulluunniit pigaluaraanni torersumi najugaqarusunnerput tikkuassallugu pingaaruteqartoq. Tamaani najuaqarusuppugut nuannaraarpullu. Eqqagassaqaraangalli avatangiisigullu mingutsinneqaraangata sumiiffigerusunneq ajorparput aamma nuannerpallaarneq ajorpoq.
Naak Ilulissani saliingaatsiartoqareeraluartoq suli suliassaqaqaaq. Kommuni naapertorlugu illoqarfimmi biilit ikinnerpaamik 50-it igitassaapput. Aamma umiatsiakut pigisallu tigussaasut allat sapaatini akunnerni tullerni pingasuni piginnittuannit qisuariarfigineqanngitsut kommunip eqqassamaarpai.
Nick Nielsenip innuttaasut eqqagassaatiminnik isumaginnilluarneruleqquai.
- Eqqagassat tamatsinneerput, kommunimiillu eqqagassat sumut iginneqarnissaannut innersuussutit malinnissaat pikkoriffiginerusariaqarparput.
Kommunip illoqarfimmi najugallit amerlanerusut eqqagassanik katersinermi tapersiinissaat neriuutigaa. Saliineq ilaatigut kommunip saliisitsinernik amerlanerusunik aaqqissuussineratigut pissasoq, Nick Nielsenip oqaatigaa.